د افغانستان د کندهار په ولايت کې د ناټو له خوا بريدونو د دوى په وينا طالبان کمزوري کړي چې اوس يوازې ځانمرگي بريدونه کوي

دغو افغانانو له يوې امنيت ساتونکې امريکايي کمپنۍ سره کار کاوۀ .

ځانمرگى په يوۀ موټر سايکل سپور و چې د کندهار او سپين بولدک تر منځ يې پر لويه لاره د امنيتي مرکز مخته ځان وچووۀ .

عيني شاهدان وايي په پېښه کې د وژل شويو کسانو له ډلې يو موټر چلونکى او درې تنه نور ساتونکي وو .

دا په تيرو دوو ورځو کې دويم ځانمرگى بريد دى چې په افغانستان کې ترسره کيږي .

پرون د خوست په ولايت کې د يوۀ ځانمرگي بريد له امله ٨ کسه وژل شوي و او ١٠ نور پکې ټپيان شوي و .

په تيرو درې نيمو مياشتو کې شاوخوا ٣٠ ځانمرگي بريدونه په افغانستان کې شوي دي چې له نني بريد سره يوازې په کندهار کې ٨ دغه ډول بريدونه ترسره شوي .

افغان او نړيوال ځواکونه دا د وسله والو طالبانو د کمزورۍ يوه نخښه بولي او وايي چې په جبهي جگړه کې يې مات کړي دي .