ناټو وايي يو سرتېرى يې په ارزگان کې له وسله والو طالبانو سره په جگړو کې وژل شوى او درې ټپيان شوي

د ناټو ځواکونو خبرپاڼه وايي يو سرتېرى يې د جگړې په ترڅ کې د ارزگان په چوره ولسوالۍ کې ووژل شوى او درې نور ټپيان شوي. د ارزگان په نښتو کې دوه افغان سرتېري هم وژل شوي.

دا درېيمه پرلپسې ورځ ده چې بهرنيوځواکونه ته په سويل کې مرگ ژوبله اوړي. تېره ورځ د امريکا په مشرۍ د ايتلاف درې سرتېري او وړمه ورځ يې يو سرتېرى وژل شوي وو.

د ايتلاف او ناټو ځواکونو په بېلابېلو خبرپاڼو کې گڼو وسله والو طالبانو ته هم د مرگ ژوبلې وراړولو خبره کړې.

د هلمند په سنگين ولسوالۍ کې وسله والو طالبانو د افغان او ايتلاف ځواکونو پر کاروان بريد کړى او په ورپسې نښته کې دواړه لورې يو بل ته د درنو مرگ ژوبلو اړولو ادعا کوي. امريکايي پوځ وايي په سنگين کې يې د طالبانو پر پټنځايونو بمبارد کړى او تر شل زيات يې وژلي، خو طالبان يې نه مني.

	دا درېيمه پرلپسې ورځ ده چې په سويل کې بهرنيو ځواکونو ته مرگ ژوبله وراوړي

په سيمه کې د ايتلاف د ځواکونو وياند يوازې د خپلو دوو سرتېرو د ژوبلېدلو پخلى کړى.
د څنگلورې کندهار ولايت په شاوليکوټ ولسوالۍ کې هم وسله والو طالبانو په ورته کمين کې د امريکا په مشرۍ ځواکونه په نښه کړي چې په پيل شوې جگړه کې امريکايي پوځ وايي تر لسو زيات جنگيالي يې وژلي.

بلخوا، د هلمند په گرشک ولسوالۍ کې ځايي اوسېدونکي او طالبان وايي د يکشنبې له سهار راهيسې هلته سخته جگړه روانه ده.

وسله وال طالبان په دغې جګړې كې د خپلو دوو ملګرو دوژل كېدلو اودوو نورو دټپي کېدلو ترڅنګ ادعاكوي چي دناټو ځواكونو دوه ګاډي يي ويجاړكړي اوپكي سپرو سرتيرو ته يي مرګ ژوبله ور اړولې

خو د ناټو ځواکونه تر اوسه پر دغې جگړې او زيانونو يې پټه خوله دي.