محمد يونس برهان له کابله

	د پکتيکا والي اکرم خپلواک وايي اوس يې پلټنې پيل کړي دي چې ولې د شپې له خوا په دغه ځاى کې ماشومان پاتې شوي و

باور دى چې دغه ماشومان د هغې مدرسې زده کوونکي و چې په بمبارد کې په نښه شوې ده.

د پکتيکا والي ډاکټر اکرم خپلواک د بمبارۍ سيمې ته ورغلى و او له بي بي سي سره په خبرو کې يې وويل چې دۀ د وژل شويو ماشومانو له کورنيو څخه بخښنه وغوښته .

ښاغلي خپلواک زياته کړه چې دوى اوس دا پلټنه پيل کړې ده چې څرنگه په دغه ځاى کې ماشومان د شپې له خوا پاتې شوي و . د دۀ په وينا د دغې ودانۍ تر څنگ په يوې بلې کې ماشومان يوازې د ماسپښين تر ١٢ بجو پورې په سبق بوخت وي .

والي بمبارد شوى ځاى پخوانۍ مدرسه وبلله او ادعا يې وکړه چې په دې وروستيو کې دغلته د دۀ په وينا ترهگر ټوليدل چې پکې عربان او چيچنياييان هم و .

د امريکا پوځ په يوه خبرپاڼه کې وايي د ماشومانو سربېره يې څو مشکوک اورپکي هم د تېرې شپې په بمبارد کې وژلي چې پکې يوه مدرسه او يو جومات په نښه شوي وو.

د پکتيکا والي وايي له اوو ماشومانو سرهبيره چې عمرونه يې د ١٢ او ١٦ کلونو تر منځ و ١٤ وسله وال کسان هم وژل شوي دي . ښاغلى خپلواک ادعا کوي چې په وژل شويو کې بهرنيان هم شته دي .

د امريکايي پوځ خبرپاڼه وايي دغه هوايي بريد يې د داسې کره استخباراتي معلوماتو له لاسته راوړلو وروسته وکړ چې په نښه شوې مدرسې او جومات کې يې د ورانکارو شتون ښوول.

د پکتيکا والي وايي دۀ پلټنې پيل کړي چې ولې په دغه ځاى کې د شپې له خوا ماشومان پاتې شوي و

خو څه چې سيمه ييز اوسېدونکي، چارواکي او د امريکا پوځ پرې يوه خوله دي هغه دادي چې د تېرې شپې په بمبارد کې لږترلږه اوه تنه د خاډليو مدرسې تنکي زده کوونکي وژل شوي.

په پکتيکا کې ځايي خبريالان وايي چې د يحيى خېلو ولسوالۍ په وروستيو کې د وسله والو طالبانو لاس ته لوېدلې او اوس بېرته حکومت نېولې.

دوى وايي په ځينو نورو ليرې پرتو او د پاکستان له پولې سره نژدې سيمو کې هم اصلي واک د طالبانو دى.

د ايتلاف ځواکونو، د پخوا خلاف، دا ځلې په خپلو پوځي عملياتو کې ولسي خلکو ته د اوښتې مرگ ژوبلې خبر لومړى دوى ورکړ.