الياس وحدت د افغانستان له سويل ختيځه

	د اوروستى بريد په پکتيکا کې يو له خونړيو څخه بلل کېږي

د پکتيکا والي ډاکتر اکرم خپلواک وايي د ملي پوځ سرتېرو نن (چارشنبه) سهار د وازېخواه ولسوالۍ په گوشته سيمه کې گزمه کوله چې له لرې کنترولېدونکى بم پرې وچاود او اوه سرتېري يې ووژل. يو بل سرتېرى په پېښه کې ټپي شوى.

د پېښې پړه طالبانو پر غاړه اخيستې ده.
دا بريد په دا وروستيو کې په پکتيکا کې يو له ډېرو خونړيو څخه بلل کېږي.

په يوه جلا پېښه کې د همدې ولايت د مټاخان ولسوالۍ ولسوال، د چارواکو په وينا، له يوه ځانمرگي بريد نه بچ شوى.

د پکتيکا د والي وياند غمى خان وايي يوه ځانوژونکي چې د مټاخان ولسوال ته لار نيولې وه، ځان يې د ولسوال له رسېدو مخکې والوزاوه، چې خالې د بريد کوونکي په مړينه تمامه شوه.

د افغانستان سويل او ختيځ ولايتونه د هيواد تر ټولو ناامنه سيمې دي، چې طالبان له حکومتي او بهرنيو ځواکونو سره پکې ډېر وخت په نښتو کې ښکېل وي.