خپلواک ساپى له کابله

	والي ډاکټر اکرم خپلواک ادعا وکړه چې بريد کونکى پاکستانى او د پنجاب اوسيدونکى دى

د پکتيکا والي اکرم خپلواک له بي بي سي سره په مرکه کې د ارگون په ولسوالۍ کې شوى دغه بريد د يوه سيمه ييز ولسوال او ورسره د پوځ د يوه سيمه ييز قوماندان د وژلو هڅه بللې .دغه دواړه چارواکي په بريد کې ژوبل شوي دي .

دغه ځانمرگى بريد د يکشنبې ( د ليندۍ ٥ د نومبر ٢٦ ) په گهيځ د پکتيکا ولايت د ارگون په ولسوالۍ کې د لويې لارې پر يوه هوټل کې هاله وشو چې د برمل ولسوال او ورسره د پوځ ملگرى قوماندان هوټل ته ورننوتل .

ظاهرا داسې بريښي چې بريد کونکى لا له وړاندې په څو کې وو .

د پکتيکا د والي اکرم خپلواک په وينا هوټل ته ورغلي چارواکي په لومړي نظر پر بريدکونکي شکمن شول خو د لاس له پورته کولو وړاندې زوروره چاودنه وشوه او درنه مرگ ژوبله يې تر شا پريښوده .

د پکتيکا والي بريد هوټل ته د ورغلو چارواکو د وژلو هڅه وبلله خو دا يې هم زياته کړه چې دوى دواړو سپک ټپونه اخيستي او اصلي تاوان ملکي وگړو ته اوښتى دى .

د پيښې اکثره قربانيان د ماشومانو په گډون ملکي وگړي دي پکتيکا د والي اکرم خپلواک

"د پيښې اکثره قربانيان د ماشومانو په گډون ملکي وگړي دي . د سرتيرو له مينځه يوازې دوه تنه وژل شوي او پخپله ولسوال او قوماندان سرسري ژوبل شوي دي . "

والي ډاکټر اکرم خپلواک ادعا وکړه چې بريد کونکى پاکستانى او د پنجاب اوسيدونکى دى.

"د کرښې پورې غاړه د ترهگرو مرکزونه دي . ځانمرگي بريد کونکي هملته روزل کيږي . دا بريد هم له هماغه ځايه را استول شوي يوه پنجابي کړى دى ."

دا د انساني تلفاتو له اړخه په وروستيو څو مياشتو کې تر ټولو دروند بريد بلل شوى . تر دې وړاندې په دغه سيمه کې دوه ورته نور بريدونه هم شوي وو خو چارواکو ويل چې پخپله د بريد کوونکو له وژل کيدو پرته يې نور تاوان نه درلود .

د پکتيکا ولايت چې د ډيورنډ کرښې ته ورڅيرمه پروت دى د نا امنيو د پيښو له اړخه يوه ناکراره سيمه بلل کيږي .

له دغه سيمې د چاودنو او ځانمرگو بريدونو تر څنگه کله ناکله د مخالفانو او حکومتي ځواکونو تر منځ د مخامخ جگړو رپوټونه هم ورکول کيږي .