ټوني بلير د برتانيا د لومړي وزير په توگه تر ١٠ کلنې دورې وروسته خپله دنده پريږدي

دۀ دغه اعلان نن ( د غويي ٢٠ د مۍ ١٠ ) په سيجفيلډ کې وکړه ، دا هغه سيمه ده چې ښاغلي بلير ورڅخه په تيرو څو دورو کې د ولسي جرگې څوکۍ گټلې ده .

ښاغلي بلير تر دې وړاندې د کابينې غړي هم له خپلې پريکړې خبر کړي و .

په خپلو خبرو کې ټوني بلير ومنله چې د دۀ حکومت تل له هيلو سره سم کار نه دى کړى خو ويې ويل چې (( خداى پرې ډير مهربانه و چې په نړۍ کې يې د تر ټولو ستر ملت مشري وکړه ))

ښاغلي بلير په هغې وينا کې چې له ولولو ډکه بلل شوې وويل چې تر ١٠ کلونو پورې يې د لومړي وزير په توگه کار کړى چې دا د دۀ او هيواد لپاره (( خورا اوږده )) موده ده .

دى د هغۀ ملاتړ له امله چې ترلاسه کړى يې و د برتانيا له ولسه منندويي وښووده او د هغه څه له امله يې بخښنه وغوښته چې دۀ کمښت وبالۀ .

پر ټوني بلير باندې برتانيا کې دننه ځينو دا نيوکه کوله چې گواکې د متحدو ايالاتو اغيز يې ډير مانۀ خو د برتانيا د اقتصاد په ښه کولو ستايل کيږي .

ښاغلى بلير به تر هغو د لومړي وزارت په دفتر کې پاتې کيږي چې واکمن کارگر گوند د دۀ ځاى ناستى ټاکي . لور د لورده تمه دا ده چې د ماليې اوسنى وزير گورډن برون به وټاکل شي .