متين سمسور له کابله

	هلمند د افغانستان هغه ولايت دى چې پکې تر ټولو زيات کوکنار کرل کېږي

د هلمند په يوې سيمه ييزې راډيو کې خپور شوي دغه اعلان کې دناټو او افغان ځواکونو د هلمند خلکو ته ډاډ ورکړى و چې د هغوى کوکنارو به دوى نه اړوي. د ولسمشرۍ دفتر او د نشه يي داروگانو ضد وزارت په دې اړه بيخبري ښودلې وه .

د جرمونو او نشه يي داروگانو پر ضد په افغانستان کې د ملگرو ملتو د ادارې مشره کريسټينا گونااوگوز وايي دا يو ناڅرگند پيغام دى چې ښايي په هيواد کې دکوکنارو او نشه يي داروگانو په وړاندې روانې هلې ځلې له ستونزو سره مخامخې کړي.

هغې وويل: ''دا يو ډول دوه گونى پيغام رسوي . له يوي خوا دوى په حق دي ځکه دنده يې داده چې ياغيان وځپي. خو بله خوا بيا د نشه يي داروگانو قاچاق کوونکي او ياغيان په خپلو کې سره نژدې اړيکې لري چې کروندگر هڅوي او يا اجازه ورکوي چې کوکنار وکري.

زه ويريږم چې دا به بزگرانو او هغو ته چې د نشه يي داروگانو سره سراو کار لري ، بد پيغام ورکړي.''

په همدې حال کې يوشمېر نور کسان بيا وايي چې د ناټو او افغان پوځ دغه اعلان د نشه يي داروگانو پر ضد د افغان حکومت او نړيوالې ټولنې د اوسنۍ تگلارۍ مخالفت کوي .

په هلمند کې د سمون په نامه په يوې سيمه ييزې راډيو کې خپور شوي دغه اعلان کې د هلمند خلکو ته ډاډ ورکړ شوي و چې د ناټو او افغان پوځ ځواکونه د خلکو کوکنار نه اړوي. دوى د خپل دې درېځ لامل دا ښودلى و چې گواکې دا په افغانستان کې د خلکو د عايداتو يوه لار ده چې دوى نه غواړي دغه لار پرې بنده کړي .

په هلمند کې مېشت په ناټو پورې اړوند د برتانوي ځواکونو يوه چارواکي ډگروال چارليس مايو ددغه اعلان د سپيناوي په تړاو بي بي سي ته ويلي و چې برتانيا د نشه يي داروگانو پرضد په روانه مبارزه کې له افغان حکومت سره د مرستې مخکښې کوي خو دا يې د ځواکونو دنده نه ده چې د کوکنارو د اړولو چارې کې ښکيل شي.

خو د ولسمشرۍ دفتر، د دفاع او د نشه يي داروگانو پر ضد وزارتونو بيا ددغه اعلان په اړه چورلټ بيخبري ښودلې.

يو شمېر شنونکي وايي دا هغه څه دي چې لامل يې ښايي د نشه يي داروگانو په وړاندې روانه مبارزه کې په افغانستان کې د نړيوالې ټولنې او افغان حکومت تر منځ ناهمغږي وي.