کرزى: که کوکنار ختم نکړو نړيوالې مرستې به بندې شي

تير کال د افغانستان د کوکنارو څخه تقريبا ٤٥٠ ټنه هيرويين توليد شول او داسې ويره يې پيدا کړه چې افغانستان به ډير ژر پداسې يو دولت باندې بدل شي چې مخدره مواد به ورباندې مسلط وي

ښاغلي کرزي وويل"" که مونږه د کوکنارو مخه و نه نيسو کوکنار به مونږه ختم کړي""

هغه وويل"" تروريستان له کوکنارو څخه گټه اخلي ، له کوکنارو څخه ترلاسه شوو پيسو يوه برخه د افغانستان د خلکو پر ضد د بمونو جوړولو لپاره لگول کيږي او د ځان وژونکو بمي بريدونو سبب کيږي""

ولسمشر کرزي واليانو ته داهم وويل چې"" که افغانستان کې د کوکنارو کر دوام وکړي نړيوال به خپلې مرستي بندې کړي ""

نړيواله ټولنه په افغانستان کې د مخدره موادو پرضد په سلگونه ميليونه ډالره او يورو لگوي چې پوليس وروزي ، د هيرويينو لابراتوارونه له منځه يوسي ، قاچاق وړونکي ونيسي او د کوکنارو کروندې له منځه يوسي ، همدا راز د بزگرانو سره مالي مرستې کوي چې د کوکنارو پرځاې قانوني شيان وکري