طاهر خان له اسلام اباد څخه

	جنرال مشرف پر افغان مشر حامد کرزي تور ولگاوۀ چې له حقايقو څخه هيڅ خبر نه دى .

جنرال مشرف اسلام آباد کې د ٢٢ هېوادونو د پوځي جرنيلانو يو کانفرنس ته په خپله وينا کې ټينګار وکړ که چيرې د پاکستان په استخباراتي ادارې (اى ايس اى ) او په دۀ د دروغو تور ولګول شو نو بيا په نړيوال اتحاد کې د پاتې کيدو هيڅ جواز نه وي .

جنرال مشرف وويل چې پاکستان د ترهګرۍ په ضد جگړه کې د ټولو هيوادونو څخه زياتې قربانۍ ورکړى دى او بايد چې په هېواد يې شک ونه کړى شي .

د جنرال مشرف په وينا پاکستان د لويديځې نړۍ هغې انتقاد سره مخامخ دى چې وايي په خپله خاوره ترهګر د منځه يوسي او دا چې افغانستان کې د طالبانو د مخنيوي لپاره په صحيح توګه همکاري نه کوي .

جنرال مشرف، چې د امريکې په مشرۍ د نړيوال ايتلاف يو مهم غړى بلل کيږي، وويل چې په پاکستان انتقاد صحيح نه دى .

جنرال مشرف د امريکې لخوا د فشار لاندى راغلى چې د طالبانو او القاعدې د غړو په ضد نور ګامونه واخلي چې ويلي کيږي اوس هم پاکستان کې پټ دى .

امريکايي او افغان چارواکو په وار وار ويلي دي چې اورپکي افغانستان کې په امريکايي ، نړيوالو او افغان ځواکونو له بريدونو وروسته د پاکستان قبايلي سيمو ته د پناه لپاره داخليږي.

په همدې ترڅ کې د کاناډا له يوې ټيلى ويژني شبکې سره په مرکه کې جنرال مشرف پر افغان مشر حامد کرزي تور ولگاوۀ چې له حقايقو څخه هيڅ خبر نه دى .

کله چې له پاکستاني ولسمشر څخه وپوښتل شول چې آيا د افغان ولسمشر په هغو څرګندونو په قهر دى چې وايي ملا عمر په پاکستان کې دى نو هغه وويل (( هو ، ډير په قهر يم )) .