افغان چارواکو ويلي وو چې پاکستان ته د ولسمشر کرزي د سفر په وخت کې ېې د طالبانو د ځينو مشرانو په اړه يو لړ اطلاعات پاکستان ته سپارلي وو

د پاکستان ولسمشر پروېز مشرف پر خپل افغان انډول حامد کرزي سختې نيوکې کړي وې

له امريکايي ټلويزيون سي ان ان سره په يوه مرکه کې جنرال مشرف ښاغلى کرزى تورن کړ چې په خپل هېواد کې له استخباراتي عملياتو هېڅ خبر نه دى.

هغه وويل ښاغلي کرزي تيره مياشت د طالبانو فراري مشر ملامحمد عمر په اړه ځېنې اطلاعات پاکستان ته وسپارل خو دا اطلاعات زاړه وو او د استفادې وړ نه وو

افغان چارواکو ويلي وو چې پاکستان کې د طالبانو د يوشمير مشرانو د اوسيدو د ځايونو په اړه ېې دقيق معلومات د پاکستان حکومت ته سپارلي وو

پاکستاني مشر دا خبره رد کړه چې گواکې حکومت يې د طالبانو يا القاعدې جگړنو په نيولو کې چې ادعا کيږي د پاکستان له خاورې څخه فعاليت کوي ، له افغان چارواکو سره مرسته نه کوي.

ښاغلي مشرف وويل د افغانستان په دفاع وزارت او امنيتي ادارو کې داسې کسان شته چې غواړي پاکستان بدنامه کړي

خود افغان ولسمشر ،حامد کرزي ، يو مشر سلاکار ، ډاکتر دادفر سپنتا، بي بي سي سره يوې مرکې کې وويل افغانستان له پاکستان سره ښې اړيکي غواړي اودا تور ېې رد کړ چې گواکې افغانستان د پاکستان د بدنامولو لپاره هڅه کوي

ښاغلي سپنتا وويل هغه اطلاعات چې د ولسمشر کرزي د سفر په وخت کې د طالبانو په اړه پاکستان ته سپارل شوي وو زاړه نه وو او دا اطلاعات مخکې هم د امنيتي ادارو له خوا پاکستان ته ورکړل شوي وو

په نړيوالو چارو کې د ولسمشر حامد کرزي سلاکار ډاکتر داد فر سپنتا وويل لدې سره چې دوى د پا کستان د حکو مت له لحن نه خوښ نه دي خو دوي د پا کستان د حکو مت په ستونزو او مجبوريتونو پوهيږي

ښاغلي سپنتا زياته کړه د پا کستان حکو مت له يوې خوا د بلوچستان له ستونزې سره مخ دى او له بل پلوه هم په هغه هېواد کې د مذهبي ډلو له بغاوت سره مخ دى او ترفشار لاندې دى

په همدې ترڅ کې د شمالي وزيرستان له قبايلي سيمې نه رېپوټونه وايي چې د پاکستاني ځواکونو او قبايلي اورپکو تر منځ چې چاروا کي گومان کوي له طالبانو سره تړاو لري، نورې نښتې شوي دي.

تيره اونۍ د امريکا ولسمشر جورج بوش پاکستان ته د خپل سفر په ترڅ کې د تروريزم پرضد ددغه هيواد له همکاري نه مننه وکړه خو وي ويل چې د القاعدې د ماتولو لپاره بايد نور ډير اقدامات وشي