ايمل پسرلى له کابله

	ولسمشر مشرف وويل پر اى ايس اى شک پر دۀ شک دى .

ښاغلي مشرف ومنل چې په تيرو وختونو کې پاکستان له طالبانو سره مرسته کړې او د هغوى ملاتړ يې کړى خو ورسره يې دلايل هم روښانه کړل .

پاکستاني مشر د افغانستان د بهرنيو چارو په وزارت کې د دغۀ هيواد جهادي مشرانو ، د ملي شورا غړو ، پوځي افسرانو او لوړ پوړو چارواکو ته وويل چې جغرافيايي موقعيت او د دۀ په وينا قومي جوړښت اسلام اباد اړ کړى و چې د ملا عمر په مشرۍ کې د طالب غورځنگ ملاتړ وکړي .

دا هغه برخه وه چې ښاغلى کرزى ورسره جوړ نه و او په خپلو خبرو کې يې وويل چې د دۀ په وينا اورپکې د کوم ځانگړي قوم استازيتوب نه کوي . ښاغلي مشرف وويل دى ديپلومات نه دى پوځي افسر دى او په همدې دليل سپينې خبرې کوي .

د دۀ په سپينو خبرو کې دا هم و چې افغانان دې تير وختونه هير کړي ، شک او پړه دې پريږدي او راتلونکي ته دې وگوري .

په تيرو وختونو کې پاکستان له طالبانو سره مرسته کړې او د هغوى ملاتړ يې کړى مشرف

افغان مشر خپل ميلمۀ ته ښکاره وويل چې افغانان پر پاکستان تور نه لگوي او نه يې هم د دۀ په وينا ملامتوي خو ورڅخه مرسته غواړي چې د اوښتونکو اورپکو مخنيوى وکړي .

پاکستاني مشر ومنل چې ځينې القاعده او وسله وال طالبان لا هم د دوى له خاورې افغانستان ته اوړي خو د دۀ په وينا يې مخنيوى خورا گران دى .

جنرال مشرف د د طالبانو د ختمولو لپاره د هغوى د مشرتابۀ او د قوماندې د مرکز د ختمولو وړانديز وکړ . د دۀ په نظر بايد دغه مرکز که هر ځاى وي وموندل شي او ختم شي .خو دا چې په څه ډول او د چا له خوا پر دې يې رڼا وانه چوله .

ولسمشر کرزي د ښاغلي مشرف پر دې هوډ خوښي وښووده چې له ترهگرۍ سره جگړه کوي .

پاکستاني مشر په ټينگار وويل چې دى او د دۀ حکومت د افغانستان په چارو کې لاسوهنه نه کوي بلکې د دغه جنگ ځپلي هيواد بيا رغاونه غواړي .

ښاغلي مشرف د کوټې او کندهار ترمنځ د اورگاډي د کرښې د جوړولو لپاره هم ټټر وواهۀ .