په ٢٠٠١ کال کې د طالبانو له نسکوريدو راهيسته په افغانستان کې د ناټو شاوخوا ٥٠٠ سرتيري وژل شوي دي

په خبر پاڼه کې د پېښې دقيق ځاى نه دى ښوول شوى او دا هم نه دي ويل شوي چې د يکشنبې په ورځ څه وخت دغه چاودنه وشوه .

داسې ښکاري چې د ناټو د گزمې گاډى پر يوۀ ماين ختلى چې له وژل شويو شپږ سرتيرو سره يو بل تن پکې ټپي شوى هم دى .

خبر پاڼه زياتوي په پېښه کې د دوى يو گاډى هم ويجاړ شوى دى خو ملکي افغانانو ته ځاني تاوان نه دى اوښتى .

د ناټو له تگلارو سره سم تر هغو د وژل شويو سرتيرو هويت نه په ډاگه کيږي چې د هغوى کورنۍ پرې خبرې نه شي .

خو په کاناډا کې د هغۀ هيواد لومړي وزير سټيفن هارپر ويلي چې سرتيري د دۀ د هيواد و .

دۀ تيره شپه وويل (( له بده مرغه دا په افغانستان کې د کاناډايي سرتيرو لپاره يوه بدمرغې ورځ وه چې شپږ سرتيري مو ووژل شول او يو شمير نور ټپيان شول . ))

د کاناډا ډير سرتيري د افغانستان د کندهار په ولايت کې ځاى پر ځاى شوي دي .

له ٢٠٠٢ کال څخه راهيسته چې د کاناډا سرتيري په افغانستان کې ځاى پر ځاى شوي دي دا ورته په يوۀ ځاى کې تر ټولو ډيره مرگ ژوبله ده .

د افغانستان د سويلي سيمو لپاره د ناټو عمومي قومندان تورن جنرال ټان وون لوون د دغې پېښې په باب په خپل غبرگون کې ويلي :

(( موږ به د دغو سرتيرو دغه قرباني چې د افغان ولس د ژوند ښه کولو لپاره يې ورکړې ده هيڅکله هيره نه کړو . ))

د يوۀ ماين چوولو يا بلې چاودنې په ترڅ کې دا د نړيوالو ځواکونو لپاره په يوه پېښه کې تر ټولو لويه مرگ ژوبله ده .

د افغانستان د سويل په يوه بله پېښه کې د ناټو يو بل سرتيرى هم پرون وژل شوى و .

په ٢٠٠١ کال کې د طالب رژيم له نسکوريدو راهيسته په افغانستان کې شاوخوا ٥٠٠ نړيوال سرتيري په بيلا بيلو پېښو کې وژل شوي دي .