رابرت گېټس په افغانستان کې د ناټو د پوځيانو ډېرېدل غواړي

هغه وويل د ناټو اروپايي غړيو ته پکار دي چې په افغانستان او ترې ور آخو پر خپلو هڅو زور وا چوي.

ښاغلي گېټس وويل د ناټو غړيو هېوادو له افغانستان سره ډېرې ژمنې کړي، او اوس يې وخت دى چې د پيسو او ځواکونو په ورکولو خپلې کړې ژمنې تر سره کړي.

هغه وويل د دې خبرې منل گران دي چې په نړۍ کې له تر ټولو پرمخ تللو هېوادو جوړه يوه ټلواله چې د پوځيانو شمېر له دوه مليونو اوړي، هغه منابع چې په افغانستان کې ورته اړتيا ده برابرې نشي کړى.

ښاغلي گېټس د دفاع د پخواني وزير دونالد رمسفېلد پر خبره د ټوکې په توگه وويل ، د زړې او نوې اروپا تر منځ اختلاف نشته، توپير يوازې د ناټو د هغو غړيو هېوادو تر منځ دى چې خپلې ژمنې پوره کوي او د هغو چې نه يې پوره کوي .

نوموړي دغه راز له اروپايي هېوادو وغوښتل چې آزادۍ او ولسواکۍ ته ورپېښو نړيوالو گواښونو ته په پام سره، پر دفاعي چارو لگښت ډېر کړي.