متين سمسور له کابله

	د ځواکونو د قوماندې مسوليت داسې مهال امريکايي جنرال ته ليږدول کيږي چې د ډيرو په وينا ، په افغانستان کې امنيتي ننگونې لا پر ځاى پاتې دي .

د ناتو نوي قوماندان جنرال مکنيل هوډ وښوده چې وسله والو طالبانو ته به ماته ورکړي.

په همدې حال کې د ناتو د ځواکونو تلونکي قوماندان وويل چې د پوځي علمياتو تر څنگ افغانستان کې پر طالبانو د بري لپاره نور و هڅو ته اړتيا ده .

برتانوي جنرال ډيوېد ريچاردز له نهو مياشتو وروسته ، په افغانستان کې دناتو ځواکونو مسوليت امريکايي جنرال مک نيل ته وسپاره .

تيرو نهو مياشتو کې په افغانستان کې دناتو ځواکونو شمير له نهه زرو څخه ، ٣٣ زرو ته پورته شو .

دتاوتريخوالو له امله ، جنرال ډيويد ريچاردز په افغانستان کې خدمت له سختو ننگونو سره پيل کړ .

د ناتو ځواکونو ماموريت د هيواد سويل او ختيځ نارامو سيمو ته وغزيد او د وسله والو طالبانو د ځپلو پر عملياتو يې لاس پورې کړ . پر دغو سيمو پخوا حکومت دومره واک نه درلود .

د ځواکونو د قوماندې مسوليت داسې مهال امريکايي جنرال ته ليږدول کيږي چې د ډيرو په وينا ، په افغانستان کې امنيتي ننگونې لا پر ځاى پاتې دي .

وسله والو طالبانو يوځلي بيا دهلمند په نارامه ولايت کې د موسي قلعه ولسوالۍ ولکه کړې ده .

د ناتو او سيمه يېزو مشرانو تر منځ د يوه تړون له مخې بايد قومي مشرانو دغه ولسوالي اداره کړې واى .

د ناتو ځواکونو تلونکي قوماندان ښاغلي ريچاردز له بي بي سي سره په مرکه کې ويلي دي چې د طالبانو يو قوماندان ملا غفور د ناتو ځواکونو په هوايي بمباريو کې وژل شوى دى .

د ناتو د ځواکونو نوى قوماندان ښاغلى نيل وايې امريکايانو د برتانويانو او قومي مشرانو سره په موسي قلعه کې د سولې پر دغه تړون نيوکه درلوده .

له دغه تړون سره په موسى قلعه کې سوله ټينگ نه شو . دغه تړون دوه ورځې وړاندې پر ولسوالۍ د طالبانو په بريد سره مات شو .

تمه کيږي چې د ناتو نوى قوماندان به لا ډير ځواکونه په واک کې ولري چې په افغانستان کې د ناتو ماموريت ترسره کړې .

خو شنونکي وايې تر اوسه لا معلومه نده چې د ناتو نوى قوماندان به د وسله والو طالبانو په وړاندې په مقابله او په افغانستان کې د امنيت د خوندې کولو په موخه له نويو لارو او تکتيکونو څخه کار واخلي اوکه نه .

د افغانستان ولسمشر حامد کرزې ، د ناتو ځواکونو څخه په هيواد کې د ټيکاو د راوستو د اصلي عامل په توگه يادونه وکړه او هيله يې څر گنده کړه چې ناتو به مرسته وکړي چې په افغانستان کې سوله ټينگ شي .