ايمل پسرلى له کابله

	په افغانستان کې د ناټو پوځي مشر که څه هم د نورو سرتيرو لاره څاري خو دا نه مني چې گواکې طالبان پياوړي شوي دي .

په افغانستان کې د ناټو پوځي مشر که څه هم د نورو سرتيرو لاره څاري خو دا نه مني چې گواکې طالبان پياوړي شوي دي .

تر هغه وړاندې چې په وارسا کې د ناټو غړي هيوادونه افغانستان ته د نورو سرتيرو پر شميرې سره سلا شي له بي بي سي سره په خبرو کې ډگر جنرال ډيويډ ريچرډز ادعا وکړه چې طالبان مات شوي او ځپل شوي دي .

دغه برتانوى افسر له تيرو شپږو اوونيو په افغانستان کې د ناټو د پوځي عملياتو مشري په غاړه لري .

دا هغه موده ده چې د افغانستان په سويلي ولايتونو کې پر نړيوالو سرتيرو خورا ډير بريدونه وشول او مرگ ژوبله يې هم ډيره وه . خو ډگر جنرال ډيويډ ريچرډز دا نه مني چې د دۀ ځواکونه له ستونزو سره مخامخ دي :

(( دا خبره اصلآ نه منم چې موږ له ستونزو سره مخامخ يوو . موږ لا د هغۀ ماموريت په پيل کې يوو چې شپږ اوونۍ وړاندې مو پيل کړى دى . د ښو سرتيرو په څير پر لنډ مهالو ستونزو نه زړۀ ماتې کيږم . موږ امنيت ټينگوو . ))

د ناټو جنرالان هيلمن دي چې نور سرتيري به دوى ته د طالبانو پر ضد د لا پراخو عملياتو موقعې ورکړي .

په افغانستان کې د ناټو قومندان له طالبانو سره هره نښته د ځان په گټه تمامه شوې گڼي خو دا چې لا هم ولې طالبان فعاله دي علت يې د دوى په وينا دا دى چې ناټو سرتيري د کندهار د پنجوايي د روانو عملياتو په څير په طالبانو پسې نه دې ورغلي .

نور سرتيري به د ناټو د قومندانانو په وينا دوى ته دغه توان ورکړي . خو دا چې دغه نور سرتيري به له کومه راځي د وارسا غونډه يې حل لاره پسې غواړي .