عبدالمالک عاصم له کابله

	د ٢٠٠٦ کال په ترڅ کې نژدې ٤٠٠٠ کسان په افغانستان کې د تاوتريخواليو له امله ووژل شول چې يوه لويه برخه يې د ملکي خلکو وه

دا په داسې حال کې ده چې په افغانستان کې د ميشتو بهرنيو ځواکونو قومندانانو په نوي کال کې د بريدونو د ډېرېدو خبرې کړي دي .

له تېرو څو مياشتو راهيسې داسې ويل کيږي چې ١٣٨٦ کال به دافغان حکومت او ددوى د مخالفينو لپاره ټاکونکى کال وي .

د مخالفينو د بريدونو د ډېرېدو او ددغو بريدونو دمخنيوي لپاره بهرني او افغان امنيتي ځواکونه د خپلو تېاريو خبري کوي .

خو په لومړي ځل دافغانستان د ملي امنيت دادارې مشر امرالله صالح وويل چې د ور رسېدلو رپوټونو پر بنسټ به په نوى کال کې امنيتي وضيعت د تېر کال په پرتله ښه وي . ښاغلي صالح د بېلگې په توگه د تېرې مياشتې يادونه وکړه چې د څو مياشتې د مخه په پرتله دده په وينا د برېدونوشمېر پکې کم وو.

(( زه ٨٦ کال د هغو دليلو نو له مخې چې نه غواړم خبري رسنۍ پرې خبرې شي د تېر کال په پرتله نسبتا ښه بولم . هغه منابع چې ورته لاس رسى لري ، له هغو پريکړو اوتصميمونو څخه ېې چې موږ خبريو چې دوى څه غواړي ، او هغه ترتېبات چې دولت ېې د امنيت د ښه والي لپاره لري ويلى شم چې نو د بريدونو او تاوترېخوالي کچه به په ٨٦ کال کې کمه وي . خپلو تېارېوته په کتو ، پردښمن د موجودو فشارونو چې په اړه ېې موږمعلومات لرو ويلى شم چې د تېر کال په پرتله به حالات په مراتبو سره ښه وي .))

نوموړي ددغو ادعاو او خپلو درلودونکو پلانونو نور جزئېات له خبريالانو پرته دکورني امنيت د جرگگۍ غړوته ورکړل . خو د خبريالانو په وړاندې يي داسې يادونه وکړه چې د هلمند پرته به دافغانستان ځېنو نورو سيمو ته هم په روان کال کې دافغان دولت مخالفين پام وکړي . خو د خپلو شته پلانونو او معلوماتو په درلودسره ېې ډاډ ښکاره کړ چې اورپکي به د ستونزو د راټوکولو وخت پيدا نه کړي .

ښاغلى صالح وويل دامريکي او پاکستان سره د استخباراتي معلوماتو شريکولو ښې پايلې درلودې . ده همدارنگه په تېر کال کې د لسگونو داسې کسانو دنيولو خبرهم ورکړ چې د ترهگرو برېدونو لپاره افغانستان ته را دننه شوي وو.

دافغانستان دملي امنيت دادارې مشر پر داسې مهال په نوي کال کې د بريدونو دکمېدوڅرگندونې کوي چې د سويلي ولايت هلمند ٤ ولسوالى عملا د طالبانو په ولکه کې دي او خبرونه وايي چې د سويل لويديځو ولايتونو ځينې نورې سېمې هم مخالفين گواښي .

تېرکال دافغانستان سويلي ولايتونود پراخو ځان مرگوبريدونو اوبريدونو شاهد وو چې په سلگونو کسانو پکې ووژل شو.