پاينده محمد څرگند له کابله

	کاپيسا ولايت په افغانستان کې د ايتلافي ځواکونو د لوى مرکز بگرام په ٢٠ کيلو مترۍ کې پروت دى.

دکابل شمال ختيځ لور ته د کاپيسا ولايت نجراب ولسوالۍ کې د دريو ماشومانو او پنځو ښځو په گډون، ديوه کور نهه غړي هغه مهال د ايتلافي ځواکونو په بمبارۍ کې ووژل شول چې د دوى پر کور د وسلوالو بريد کونکو شک وشو.

د کاپيسا ولايت مرستيال والي سيدمحمد داوود هاشمي وايي تيره شپه نجراب ولسوالۍ کې د ايتلافي ځواکونو پر يوه مرکز له يوه کوره بريد وشو چې دافغان ځواکونو په وينا دغه کورته وسلوال کسان د ننوتو پر مهال ليدل شوي و.

ښاغلى هاشمي وايي داچې په بريد کې وسلوال کسان نه بلکې ښځې او ماشومان مړه شوي، ښايي دغه کورته د ننوتو پر مهال ليدل شوو وسلوالو کسانو کور وار له مخې پريښى وي.

د ايتلافي ځواکونو يو ويندوى بيا د بمبارۍ پخلى کوي خو ملکي کسانو ته د اوښتو تلفاتو په اړه جزئيات نه ورکوي.

د کاپيسا ولايت دپوليسو مشر محمد عوض مظلوم وايي دوى اړ دي پر هر هغه ځاى بريد وکړي چې دوى او سيمې ته ترې گواښنه کيږي.

که څه هم د پيښې د قربانيانو شمير او پيژندگلوي تر بمبارۍ لږ وروسته څرگنده شوه چې ډيره برخه يې ښځې او ماشومان جوړوي، خو د ښاغلي مظلوم په وينا د بشري حقونو په برخه کې فعالين او دولايتي کارکونکو په گډون يو پلاوى يې سيمې ته استولى چې د پيښې پلټنه وکړي.

کاپيسا ولايت په افغانستان کې د ايتلافي ځواکونو د لوى مرکز بگرام په ٢٠ کيلو مترۍ کې پروت دى.

په دغه ولايت کې نا امني او پر ايتلافي ځواکونو د بريدونه پيل او يا هم دوام، د نورو لرو پرتو او سرحدي ولايتونو په پرتله افغانستان ميشتو بهرنيو ځواکونو ته ستر گواښ بلل کيږي.

پرون هم ختيځ ننگرهار ولايت کې د ائتلافي ځواکونو پر کاروان په ځانمرگي بريد او ددوى په ډزو کې، شپاړس کسان مړه او ٢٥ ټپيان شول چې د خلکو د قهر د راپارولو او د ولسمشر کرزي د کلک غبرگون ښودلو لامل شو