ميرويس افغان

	ولسمشر حامد کرزي د بمبارۍ د پلټنې امر ورکړ او له ولسه يې وغوښتل چې د دۀ په وينا ترهگرو ته پناه ورنه کړي .

ښاغلي کرزي په يوۀ خپارۀ کړي بيان کې د کندهار د پرونۍ بمبارۍ په باب د څيړنې او پلټنې امر هم کړى دى .

په هغې بمبارۍ کې اوس ايتلافي ځواکونو منلې چې لږ تر لږه ١٦ ملکي کسان هم وژل شوي دي .

د افغانستان د ولسمشرۍ له دفتره په خپارۀ شوي يوۀ بيان کې د کندهار د پنجوايي ولسوالۍ پر پرونۍ بمبارۍ ل اندېښنه ښول شوې ده .

ولسمشر کرزى چې د متحدو عربي اماراتو په سفر بوخت دى په خپلو څرگندونو کې د دوى په وينا د ترهگرو دا عمل هم غندي چې له استوگنځايونو او ملکي خلکو څخه د دفاعي ډال کار اخلي .

ولسمشر کرزي دا هم ويلي چې د نړيوالو ايتلافي ځواکونو قومندان به وربولي چې د دغې بمبارۍ سپيناوى ورته کړي .

د کندهار د پنجوايي ولسوالۍ پرونۍ بمباري د دوو اوونيو تر سختو جگړو وروسته وشوه .

په تيرو دوو اوونيو کې د ځايي چارواکو په وينا د افغان پوځ او ايتلافي ځواکونو له خوا په پلان شويو عملياتو کې په سلگونو وسله وال طالبان وژل شوي دي .

د بمبارۍ په سيمه کې هم د ايتلافي ځواکونو او ځايي خلکو په وينا طالبان ټول شوي وو . په بمبارۍ کې ټپي شويو کسانو بي بي سي ته وويل چې د دوى کورونو ته طالبان په زور ورغلل او دايتلافي ځواکونو پر الوتکو يې ډزې وکړې .

په کندهار کې د ايتلافي ځواکونو يوۀ وياند بي بي سي سره په خبرو کې ومنله چې په دغو بمباريو کې ١٦ ملکي کسان وژل شوي دي .

دا هغه شميره ده چې پرون د کندهار والي هم يادوله . خو ځايي خلک ملکي کسانو ته وراوښتې مرگ ژوبله تر دې ډيره بولي .

ولسمشر کرزي په خپلو څرگندونو کې پر خلکو غږ کړى دى چې د دۀ په وينا ترهگرو ته په خپلو کورونو کې اجازه ورنه کړي. افغان مشر د بمبارۍ د پلټنې امر هم کړى دى .