ميرويس افغان له کندهاره

	د کندهار په تر ټولو نا ارامې ولسوالۍ پنجوايي کې له تيرو څو مياشتو نښتې روانې دي

د كندهار هوايي ډګر ته څېرمه د خوشآب دكلي پر خامه سړك نن ( چارشنبې د وږي ١ د اگست ٢٣ ) سهار وختي دوې پرله پسې چاودنې وشوې چې وركې د يوماشوم په ګډون درې ملكي وګړي ووژل شول او يو بل سخت ژوبل شو.

سيمه ييز خلك وايي چې لا له وړاندې د ځينو ليكل شويو پاڼو په وسيله د طالبانو له لوري دوى ته خبر وركړل شوى وو چې د خوشآب پرسړك دې تګ راتګ نه كوي ځكه د دغو خلكو په وينا پر دغه لاره نړيوال ځواكونه تګ ــ راتګ كوي او ګواكې طالبان به بمونه ورته ښخ كړي .

تر دغو دوو بمي چاودنو يوازې يوه ورځ وړاندې دكندهار ښار په شمال كې پر نړيوالو ځواكونو يو ځانمرګى بريد وشو، په دغه ځانمرګي بريد كې د ناټو د پوځ په وينا د آيساف څلور سرتيري سخت ټپيان شول چې يو يې تيرماښام مړ شوى دى .

ځانمرګي بريد يو ملكي كس وواژۀ او يو بل يې ټپي كړ ، نېژدې يوه مياشت وړاندې د ناټو ځواك په رسمي توګه د سويل لويديځو ولايتونو د قوماندې چارې ترلاسه كړې چې تر دا مهاله يې په بيلابيلو پېښو كې د ١٠ پوځيانو وژنه تاييد شوې ده.

نن په يوې جلا پرختيا کې د ناټو د ځواکونو له خوا د بمباري خبر ورکړل شوى چې د كندهار په جنګ ځپلې ولسوالي پنجوايي كې يې ١١ كسان وژلي دي .

وژل شوي كسان ځينې سيمه ييز اوسيدونكي د انګورو د باغونو هغه كاريګران بولي چې تيره شپه يې له باغونو څخه انګور پريكول او د ناټو د ځواكونو هوايي بريد پرې وشو .

دغه كسان د پنجوايي ولسوالۍ د پاشمول په سيمه كې تېرماښام بمبار شوي دي .

خو د كندهار په هوايي ډګر كې د ناټو د ځواكونو پوځي وياند جګړن اينس په بمبارۍ كې وژل شوي ١١واړه كسان وسلوال طالبان بولي او وايي چې په دغه سيمه كې د غلچكي بريد په موخه راغونډ شوي وو.

بل لور ته طالبان وايي چې په وژل شويو كسانو كې د دوى يو کس هم نشته .