ميرويس افغان له کندهاره

	د طالبانو د واكمنۍ تر ړنګيدو وروسته په لومړي ځل پر نړيوالو ځواكونو باندې د هاوان د بريد پخلى كيږي

دغه بريد د كندهار په سويل لويديځه ولسوالۍ پنجوايي كې په نړيوالو سرتيرو وشوو ،تر بريد سملاسي وروسته وړمه شپه پر نړيوال آيساف باندې د هاوانونو د بريد خبر لومړى طالبانو وركړ.

وسلوالو طالبانو ادعا وكړه چې د هاوانونو په دغه بريد كې نړيوالو سرتيرو ته پراخه مرګ ژوبله وراړولې ده خو نړيوالو ځواكونو د طالبانو دغه خبره رد كړه او ويې وويل چې د هاوانونو بريد په پنجوايي ولسوالۍ كې د كاناډايې ځواكونو پر پوځي اډه شوي او شپږ سرتيري يې ټپيان كړي دي .

د دغه پوځي وياند په خبره د ټپي شويو عسكرو روغتيايي حالات د ډاډ وړ دي يو كس يې له روغتون څخه وتلى او د پنځو كسانو درملنه يې د كندهار په هوايي ډګر كې کيږي.

د يادولو وړ ده چې د طالبانو د واكمنۍ تر ړنګيدو وروسته په لومړي ځل پر نړيوالو ځواكونو باندې د هاوان د بريد پخلى كيږي تردې وړاندې په سويل لويديځو ولايتونو كې څو څو ځله پر نړيوالو ځواكونو د توغنديو د بريدونو پخلى شوى دى .