صمد روحاني له لشکرگاه څخه

	ناټ د دغو نښتو په باب څه نه وايي خو ځايي خلک ، افغان چارواکي او وسله وال طالبان يې تاييدوي

بل پلو د لشکرگاه په خولۀ کې د نادعلي له ولسوالۍ هم په لومړي ځل د ناټو پر يوۀ کاروان د بريد خبر راغلى دى .

د هلمند په شمال کې د گريشگ او سنگين ولسوالۍ له ډيره وخته د نښتو شاهدې وې .

په دې وروستيو کې ناټو ويلي و چې د هلمند په شمال کې وسله وال طالبان سره ټول شوي او مرکزونه يې جوړ کړي دي .

خو ناد علي چې له مرکز لشکر گاه څخه ايله ١٥ کيلومتره ليرې پرته او تر ډيره ځايه د دغه ولايت تر ټولو خوندي سيمه بلل کيده اوس د نښتو پر يوې نوې سيمې بدله شوې ده .

دغلته په دې وروستيو کې د کوکنارو د اړولو هڅې پيل شوي چې ځايي خلک يې غصه کړي دي .

د هلمند د امنيې د قومندانۍ سرپرست جنرال محمد عيسى بي بي سي ته وويل چې په نادعلي کې د ناټو د ځواکونو پر گزمې وسله والو طالبانو بريد کړى او يو زغره وال گاډى يې ويجاړ کړى دى .

دۀ د مرگ ژوبلې څه ونه ويل . خو سخته جگړه په گريشک او سنگين ولسواليو کې شوې چې د ځايي اوسيدونکو په وينا پکې له تيرې شپې څخه د ناټو او وسله والو طالبانو ترمنځ اخ و ډب روان دى .

که څه هم د مرگ ژوبلې دقيقه شميره په اسانه نه معلوميږي خو د سنگين ولسوالۍ ځايي خلک ادعا کوي چې په دغو نښتو کې درې ماشومان وژل شوي او اته عام وگړي پکې ټپيان شوي دي .

په گريشک کې بيا وسله وال طالبان وايي چې ناټو د دوى پر مرکزونو بريد کړى دى .

دغلته هم د مرگ ژوبلې شميره نه ترلاسه کيږي . ناټو پر دغو عملياتو لا تر اوسه څه نه دي ويلي .