عبدالصمد روحاني له لشکر گاه څخه

	ناټو وايي د تيرې شپې په بمبارۍ کې يې د طالبانو يو مهم کس وژلى دى

ناټو د دغه ( مهم ) طالب مشر نوم نه دى اخيستى خو ځايي چارواکي وايي ښايي دغه مشر د ملا عبدالغفور ورور وي . ملا عبدالغفور د موسى کلا په ولسوالۍ کې د طالبانو پوځي قومندان دى .

خو د هلمند د امنيې قومندان مل پاسوال نبي جان ملاخيل وايي دوى گومان نه کوي چې خپله ملا عبدالغفور دې په دغې بمبارۍ کې وژل شوى وي .

د مل پاسوال په وينا د دوى په معلومات دا ښيي چې د ملا عبدالغفور ورور وژل شوى دى .

افغان چارواکي او د ناټو ځواکونه وايي چې په بمباري شوي ځاى کې وسله وال طالبان په يوه غونډه بوخت و .

په دغې بمبارۍ کې شپږ کسان ټپيان شوي هم دي . موسى کلا هغه ولسوالي ده چې تير کال پکې د ناټو ځواکونو او ځايي سپين ږيرو ترمنځ د سولې تړون وشو .

له هغۀ تړون وروسته تر ډيره وخته د موسى کلا په ولسوالۍ کې اخ و ډب نه و . ناټو اوس هم ټينگار لري چې د تيرې شپې بمباري يې هم له هغې ساحې وتلې وه چې د دوى تړون پرې عملي کيږي .

بل پلو افغان چارواکي ادعا کوي چې د ملا بسم الله په نامۀ د طالبانو يو بل قومندان دوى ژوندى نيولى دى .

دغه کس د هلمند په ولايت کې د ځايي چارواکو په گواښلو تورن و او ظاهرآ يې د طالبانو له خوا تبليغاتي کار کاوۀ .

د هلمند په ولايت کې نن ( جمعه د سلواغې ٦ د جنوري ٢٦ ) يو ځانمرگى بريد هم شوى دى .

دغه بريد په مرکز لشکرگاه کې د يوې بهرنۍ مرستندويې موسسې دباندې شوى چې يوازې يو کس پکې ټپي شوى دى .

د ٢٠٠٧ کال په ترڅ کې دا اووم ځانمرگى بريد دى چې د افغانستان په بيلا بيلو سيمو کې ترسره کيږي .