ايمل پسرلى له کابله

	برتانوى ډگر جنرال ډيويډ ريچرډز وايي په موسى کلا کې د وسله والو طالبانو پيدا کيدل به په دې مانا وي چې قومي مشرانو له خپلې ژبې اوړي

د طالبانو له نسکوريدو راهيسته دا لومړى ځل و چې نړيوالو ځواکونو د ولسمشر کرزي د حکومت په ملاتړ له ولسي خلکو سره د روغې جوړې له لارې د ټوپک خولې وتړلې .

کورنيو او بهرنيو نقد کوونکو دا د طالبانو لپاره د ساه اخيستو موقعې وبلله . خو ملاتړ يې په موسى کلا کې کراري د عادي ژوند د راستنيدو پيلامه گڼي . په هلمند کې څه باندې درې زره برتانوي سرتيري ځاى پر ځاى دي .

همدوى د ناټو په چوکاټ کې د موسى کلا د جوړ جاړي تر ټولو ژبه ور ملاتړي دي . خو په افغانستان کې د ناټو پوځي مشر ډگر جنرال ډيويډ ريچرډز وايي د دغې ولسوالۍ حالات له نژدې څاري .

د دۀ په وينا که چيرې داسې څرک ولگيږي چې وسله وال طالبان په دغې ولسوالۍ کې فعاليت کوي نو دا به د قومي مشرانو له خوا له خپلې ژبې اوښتل وي .

د دغه برتانوي جنرال په وينا که چيرې داسې څه وويني نو برتانوي سرتيري به يو وار بيا په موسى کلا کې ځاى پر ځاى شي . د ځايي خلکو په وينا دغلته د ناټو او وسله والو طالبانو ترمنځ څو مياشتنيو نښتو عادي ژوند په ټپه درولى و .

خو له جوړ جاړي څخه وروسته يو وار بيا داسې نښې ليدل شوي چې ښايي د مثبت بدلون په لور گام اخيستل شوى وي .

د موسى کلا د جوړجاړي برياليتوب شايد د هلمند او نورو جنگ ځپلو ولايتونو سيمو ته دا موقعې برابره کړي چې د ټوپک خولې پکې وتړل شي .