ميروس افغان له کندهاره

	د هلمند ولايت چارواکي وايي کليوالو ته ويل شوي وو چې يا له خپلو مېنو ووځي او يا طالبان ځواب کړي .

تېره ورځ تر اوږدې جګړې وروسته طالبان د كجكي ولسوالۍ په ميانرودي كلي، د خانانو كلي او پراويانو كلي باندې ورننوتل، وروسته له هغه يې د پوزي پر امنيتي پوسته وسله وال بريد وكړ، د بريد په ترڅ كې د چارواكو په وينا اووه كسان ووژل شول چې يو يې عسكر او شپږ يې وسله وال اورپكي وو.

د هلمند مرستيال والي امير محمد اخندزاده د ټيليفون پر كرښه بي بي سي ته وويل چې د جګړې په ترڅ كې درې نور طالبان ژوبل شوي هم دي.

خو بل لوري ته طالبانو يو وياند قاري يوسف دا خبره كوي چې تر طالبانو د دولتي ځواكونو مرګ_ژوبله زياته ده، البته امير محمد اخندزاده وايي چې د وژل شويو طالبانو په اړوند ثبوتونه په لاس كې لري.

دغه جګړه د جمعې په ورځ غرمه پيل شوې وه او د ورځې تر وروستيو پورې يې دوام درلود.

د هلمند د مرستيال والي خبره ده چې دوى پرون سيمه ييزو خلكو ته خبردارى وركړى و چې يا دې په خپله د سيمې له كليو څخه كډې بار كړي او يا دې طالبان په دې مجبور كړي چې له كليو څخه ووځي چې دولتي ځواكونو ته د عملياتو لار ورخلاصه شي.

د نوموړي په وينا د تېرې شپې په اوږدو كې د كليوالو د خبرداري په بنسټ طالبان له كليو وتلي او له جګړې پرته بېرته سيمه دولتي ځواكونو په خپله ولكه كې اخيستې ده.