دا چاودنه په داسي مهال کې شوې ده چې ښاغلى کرزى د يو نا اعلان شوې سفر په لړ کې کندهار ته رسيدلى دى

د لښکرگاه د ښار د امنيې قومندان په چاودنه کې د٦ کسانو د وژل کيدو پخلى وکړ چې دوه کسان يي ملکي وگړى او ٤ نور يې امنيتي ساتونکي وه. په دې چاودنه کې ٨ امنيتي ساتونکي تپيان شوې دي.

طالبانو د بريد پړه منلې ده او ويلي دي چې ځان وژونکى د هلمند ولايت يو اوسيدونکى وو چې په بريد کې يې هدف والې وو.

په دې وروستيو کې د هلمند ولايت والي ته ويل شوى وو چې له خپلې دندې نه به ليري شي خو نوموړى تر اوسه خپلې دندي ته دوام ورکړى دى .

په هلمند کې دا چاودنه په داسي مهال کې شوې ده چې د افغانستان ولسمشر حامد کرزى د يو نا اعلان شوې سفر په لړ کې کندهار ته رسيدلى دى او هلته يې د امنيت په اړه غونډه کې برخه اخيستې ده.

	طالبانو د بريد پړه منلې ده او ويلي دي چې د ځان وژونکى هدف والې و

په دغه غونډه کې په کابل کې د امريکا سفير، د اروپايي ټولنې استازي، وزيرانو او د ځينو ولايتونو واليانو برخه درلوده.

دا لومړى ځل دى چې ددې ډلې غونډه له کابل څخه دباندي په يوه بل ولايت کې تر سره کيږي.

له بلې خوا په افغانستان کې د امريکا په مشرې ځواکونه وايي د خوست په ولايت کې يې پر يوه کور د بريد په نتيجه کې يوه ځوانه نجلې او ٤ نور مشکوکه اورپکې وژلې دي.

پوځ ويلي دي چې د افغان او نړيوالو ځواکونو په گډو عملياتو کې د ٨ کالو يوه نجلې هم تپي شوې ده.

پوځ ويلي دي چې جگړه هله پيل شوه چې مشکوکو اورپکو دوى ته د ځان له ورسپارولو نه ډډه وکړه او ددوى پر سر تيرو يې ډزې پيل کړې.

په خبر پاڼه کې ويل شوي چې جنگياليان د افغان حکومت غليمان وه چې د خلگو په ميشت ځايونو کې يې عمليات کول. په عمالياتو کې افغان او نړيوالو سر تيرو ته کومه مرگ ژوبله نه ده اوښتې.