ميرويس افغان له کندهار څخه

	د کندهار د بمي چاودنې يوه صحنه له ارشيف څخه

د پېښې سيمه د تل په څېر نړيوالو ځواکونو کلا بنده کړې وه، پوليسو او د ايساف سرتېرو تر ډېره وخته خبريالانو ته اجازه نه ورکوله چې د پېښې ځای ته ورشي.

د ايساف دوه موټر زيان من شوي وو او ميرويس مېنه يو ځل بيا څرخي الوتکو پر سر اخيستې وه، خلک د تل په څېر وارخطا ښکارېدل.

د پېښې وروسته د کندهار ميرويس روغتون ته نهه ټپيان راوړل شوي دي. ډاکټرانود دوو ټپيانو روغتيايي حالت د اندېښنې وړ ښودلی.

د ټپي شويو کسانو د کورنيو غړو يا نږدې خپلوانو د ميرويس روغتون فضا غمجنه کړې وه، ژړاوې وې او ډاکټرانو له ځينو ځوانانو څخه د وينې غوښتنه کوله ـ

دا په روانه اوونۍ کې دويمه پېښه ده تر دې وړاندې د تېرې يکشنبې په ځانمرګي بريد کې چې وروسته دنړيوالو ځواکونولخوا پر ولسي وگړو ډزې هم وشوې نږدې ١٥ ټپيان ميرويس روغتون ته ور وړل شوي وو.

د سه شنبې د لېندۍ ١٤ مې د نننۍ پېښې عيني شاهدانو دا يو ځانمرګۍ بريد وباله او ويلي دي چې يو ټونيس موټر د نړيوالو سوله ساتو ځواکونو له کاروان سره وجنګېد،

خو د کندهار په هوايي ډګر کې د ناټو ځواکونو يوه پوځي وياند بي بي سي ته وويل، چې دا يوه بمي چاودنه وه او د دوی دوه سرتيري يې ټپيان کړي دي دغه پوځي وياند دا ومنله چې د ايساف ځواکونو دوه پوځي موټر په پېښه کې څه نا څه زيانمن شوي دي خو د ملکي وگړو په مرګ ژوبله يې ځان ناخبره وښود.

ځينو عنيي شاهدانو دا خبره هم کوله چې د پېښې په ځای کې يې د يوه ملکي کس مړی ليدلی دی، خو ما په خپله ونه ليدـ

ځينې خلک وايي دغه ډول پرله پسې پېښو د کندهار امنيت له ګواښ سره مخامخ کړی او اوس په دغه ولايت کې ډېری خلک له ورځنيو اقتصادي ستونزو سره مخامخېږي.