وسله وال طالبان ادعا کوي چې ناټو له خپلو سنگرونو نه دې په شا کړي خو د دغې خبرې پخلى بلې سرچينې نه دى کړى .

ځايي خلک وايي دغه نښته خورا سخته ده خو د مرگ ژوبلې په باب يې دقيق معلومات نشته .

وسله وال طالبان ادعا کوي چې ناټو له خپلو سنگرونو نه دې په شا کړي خو د دغې خبرې پخلى بلې سرچينې نه دى کړى .

ناټو تر اوسه پر دغو عملياتو څه نه دي ويلي . د چارشنبې په ورځ کجکي ته نژدې د موسى کلا په ولسوالۍ کې د ناټو په يوۀ هوايي بريد کې د ملا منان په نامۀ د وسله والو طالبانو هغه قومندان وژل شوى و چې ناټو د کجکي په ولسوالۍ کې پر بريدونو تورناوۀ .

د ملا منان وژل د ناټو د هغو هڅو يوه بله برخه وه چې ويل يې له دې وروسته د وسله والو طالبانو قومندانان په نخښه کوي .

د کجکي په ولسوالۍ کې نننى ( پنجشنبې د سلواغې ٢٦ د فبروري ١٥ ) بريد ظاهرآ په دې هيله روان دى چې وسله وال طالبان دغلته مرکز او پناه ځاى ونه مومي .

تيره اوونۍ د هلمند والي اسد الله وفا بي بي سي ته وويل چې شاوخوا ٧٠٠ کسان له پاکستان څخه هلمند ولايت ته اوښتي چې د دۀ په وينا پکې عرب ، چيچن او پاکستاني القاعده غړي دي .

د پوځي چارو شنونکي وايي له کله چې برتانوي سرتيري هلمند ته راغلي تر ډيره يې تگلاره همدا ده چې پر وسله والو طالبانو باندې د پناه ځاى ودروي .

په پيل کې دوى د موسى کلا په څير ځينو ولسواليو کې د دولتي ودانيو د ساتنې او په وړو ښارگوټو کې د کابل د واکمنۍ د غځولو هڅه کوله .

دغه ډول هڅې يې په دې بريالۍ نه وې چې پرله پسې پرې غلچکي بريدونه کيدل . د ځينو په وينا همدا دليل و چې ناټو تير کال د موسى کلا له ولسوالۍ څخه تر هغه وروسته ووتل چې د ځايي حکومت په خوښه سپين ږيرو ته واک وسپارل شو .