ميرويس افغان

	ځايي خلک وايي د وسله والو طالبانو له خوا د ولسوالۍ د ودانيو د نړولو په منطق نه پوهيږي

ځايي خلک بيا وايي چې وسله وال طالبان په موسى کلا کې واکمن دي او پر هغۀ لانجمن اوربند يې پښه اېښې چې ترمخه يې تير کال د ناټو ځواکونو دغه سيمه ځايي سپين ږيرو ته پراېښې وه .

ځايي خلکو بي بي سي ته ويلي چې وسله والو طالبانو تيره شپه د موسى کلا پر مرکز يرغل کړى ، ځينې سپين ږيري يې نيولي او د ولسوالۍ مهمې حکومتي ودانۍ يې پر بلډوزرونو له خاورو سره خاورې کړي دي .

د عيني شاهدانو په وينا د هلمند د مرکز لشکرگاه شمال ته د پرتې گڼ مېشتي ولسوالۍ موسى کلا اوسيدونکي جوپه جوپه د خوندي سيمو په لور خوځي .

دوى ويره لري چې د وسله والو طالبانو له خوا پر دغې ولسوالۍ باندې د تيرې شپې تر يرغل وروسته ښايي د ناټو ځواکونه په ځواب کې هوايي بمبارۍ وکړي . په کابل کې د ناټو يوې وياندې پر دغو وروستيو پرمختياوو ناخبري وښووده.

خو د هلمند والي اسد الله وفا له بي بي سي سره په خبرو کې منلې چې وسله والو طالبانو پر موسى کلا ولسوالۍ بريد کړى ، د ولسوال د دفتر ودانۍ ته يې د دۀ په وينا تاوان اړولى دى . ښاغلي وفا ټينگار کاوۀ چې ولسوالي لا هم له ځايي سپين ږيرو سره ده .

ځايي خلکو دا نظر نه تاييداوۀ او ويل يې چې وسله وال طالبان پر دغې ولسوالۍ واکمن دي .

دا لا معلومه نه ده چې وسله والو طالبانو ولې د تير کال هغه تړون مات کړى چې ترمخه يې ناټو ځواکونه له ولسوالۍ ووتل او واک يې ځايي سپين ږيرو ته پرېښود .

د عيني شاهدانو په وينا د طالبانو په وړاندې مقاومت نه دى شوى . ځينې يې علت د وسله والو طالبانو قوت او په ولسوالۍ کې د مېشتو ځواکونو کمزوري گڼي .

وسله والو طالبانو په چټکۍ ځينې هغه سپين ږيري ونيول چې د تړون ترمخه پر ولسوالۍ کې برلاسي پاتې شوي و . د موسى کلا د ښار ځينو اوسيدونکو ويل چې طالبانو د بلډوزرو په مټ د ولسوالۍ ودانۍ ، د امنيې قومنداني او زندان ونړاوۀ .

ځايي اوسيدونکي وايي دوى د وسله والو طالبانو له خوا د دغو ودانيو د نړولو په منطق نه پوهيږي .

د موسى کلا د ولسوالۍ او د امنيې د قومندانۍ لپاره ودانۍ په دې وروستيو کې په خورا ډير لگښت بيا رغول شوې وې .

ځايي اوسيدونکي وايي دوى د وسله والو طالبانو له خوا د دغو ودانيو د نړولو په منطق نه پوهيږي .

ځينې دا عمل د دې ښکارندويه بولي چې گواکې وسله وال طالبان دغلته د پاتې کيدو هيله او توان ښايي په ځان کې نه ويني .

د موسى کلا ولسوالۍ د ٢٠٠٦ کال په ترڅ کې د ناټو او وسله والو طالبانو د سختو نښتو شاهده وه .

ځايي سپين ږيرو دغه نښتې هغه مهال پاى ته ورسولې چې د وسله والو طالبانو او ناټو ترمنځ يې منځگړيتوب وکړ او له دواړو غاړو يې وغوښتل چې د ولسوالۍ امنيت دوى ته پرېږدي .

پر دغه تړون سختې نيوکې هم وشوې او آن دا وويل شول چې گواکې د ناټو غړي هيوادونه پرې يوه خولۀ نه و. د وسله والو طالبانو له دې وروستي يرغل سره د موسى کلا اوسيدونکي اوس بيا په دې ويره کې دي چې جگړه به يې سيمې ته ورستنيږي .