د ولسي جرگې ټاکل شوي فعال غړي تر دې وړاندې په دې ډول نه و وژل شوي

دغه غړى د سمنگان ولايت استازى و چې مولوى اسلام محمدي نوميدۀ او هغه وخت ووژل شو چې په کابل کې له خپل استوگنځي څخه د جمعې د لمانځۀ په نيت ووت .

د کورنيو چارو د وزارت وياند زمري بشري بي بي سي ته وويل چې پوليسو سيمه کلابنده کړې او له يوۀ کوره يې داسې کلاشنکوف موندلى چې تازه کاريدلى و .

دا معلومه نه ده چې چا مولوى اسلام محمدي وژلى دى . دى پخوا د طالبانو په واکمنۍ کې د باميانو د والي په توگه دنده ترسره کړې ده .

د شوروي اتحاد د ځواکونو پر ضد د جهاد پر وخت مولوى محمد محمدي د محمد نبي محمدي د اسلامي حرکت د گوند غړى و .

د مجاهدينو په جلا وطنه حکومت کې ښاغلى محمدي د علمي څيړنو د وزير په توگه فعاله و .

دوه کاله وړاندې په افغانستان کې د ولسي جرگې له ټاکنو وروسته مولوى اسلام محمدي لومړنى غړى شو چې د نامعلومو کسانو له خوا وژل کيږي .

له پارلماني ټاکنو سره لاسي وړاندې د لغمان ولايت يو غوره شوى غړى ووژل شو خو هغه مهال لا د ولسي جرگې غونډې نه وې پيل شوې .

دغه راز د ټاکنو د منډو ترړو پر وخت په بيلا بيلو ولايتونو کې ځينې کانديدان وژل شوي و .