محمود کوچى د ولسي جرگې له تالاره

	ملالۍ جويا ويل مجاهدين په دوه ډلې سره وېشلي دي .

په پام کې وه چې په ننۍ غونډه کې د افغانستان کلنۍ بودجه يا تائيد او يا هم رد شوې واى خو د جرگې استازي په نورو فرعي موضوعاتو تم شول .

په غونډه کې مخکې تر دې چې په اصلي موضوع بحت او خبرې وشي يو شميراستازي په فرعي موضوع گانو تم شوه ، په دې وخت کې د فراه ولايت استازې ملالۍ جويا په خپلو خبرو کې مجاهدين په دوو ډلو سره وويشل ، دهغې په وينا يوه ډله مجاهدين هغه دي چې د خداى د رضا او اسلام لپاره يې جهاد کړى او بله ډله هغه چې خپلې گټې يې په پام کې نيولي دي .

دهمدغې خبرې تر اوريدو وروسته د ولسي جرگې فضا خړه پړه شوه ، ځينو استازيو هغې ته د سپکو سپورو د ويلو تر څنگ په هغې د څښاک د اوبو ډک بوتلونه وويشتل :

اغلې جويا وويل : ( په پارلمان کې نه ښايي چې يو بل ته سپکې سپورې وويل شي ، ځينو نارينه استازيو راته سپکې سپورې وويلې تر ټولو دردونکې دا وه چې ځينو ميرمنو هم داسې سپکې سپورې راته وويلې ، زه يې په بوتلونو وويشتم په بوټانو او څپلکو يې راباندې گوذارونه وکړه ، دوى چې د شريعيت نارې سورې وهي ايا په دې نه پوهيږي چې په اسلام کې په ښځو د لاس پورته کول گنا دې خو کله چې دوى خپلې شخصي او تنظيمي گټې په خطر کې وويني نو بيا يې اسلام هير شي ، تر هغې پورې چې ژوندى وم نو زه به خپل غږ اوچت ساتم که ما غلې کړي خو غږ مې نه شي غلى کولاى .)

کله چې ځينو استازيو د اغلې جويا په پلوۍ خبرې وکړې د کابل ولايت استازي عبدالرب رسول سياف د جرگې له مشر نه وغوښتل چې که چيرته په جرگه کې د اسلام او مجاهدينو سپکاوى کيږي نو په کار نه ده چې په غونډه کې تم شي .

ښاغلي سياف وويل :( دلته په کار نه ده چې غوڅ اکتريت توهين شي او داسې دې هم څوک نه وايي چې مجاهدين له زوره کار اخلي نور موږ څومره خبرې تيرې کړو که د دې چت لاندې د استازيو ترکيب ته وگورئ نو پوهيږئ چې مجاهدين غوڅ اکتريت تشکيلوي ، قانوني صيب ! په هغې غونډه کې چې د ديني ارکانو په وړاندې ملنډې وهل کيږي زموږ دين موږ ته اجازه نه راکوي چې په هغه غونډه کې کښينو .)

د غونډې ډيرو برخه والو د ملالۍ جويا په سپکاوي سخت غبرگون ښودلو هغوى ويل که وضعه همداسې روانه وي نو راتلونکي څلور کاله به څنگه تيروي .

د ننگرهار ولايت استازې سايمه خوگياڼۍ وايي چې د يوې ميرمنې سپکاوى د ټولو استازيو سپکاوى دى .

ډير استازي په دې خپه وه چې د غوڼډې اصلي موضوع چې د روان کال د بودجې تائيد او يا ردول وه په ځاى پاتې شوه او غونډه په بل لورې روانه ده . د کندز ولايت استازى معين مرستيال همدغه خبره کوي .

د ماليې وزارت چارواکي وايي په کار وه چې د بودجې په سر بحتونه لا وختي پاى ته رسيدلي واى خو اوس داسې ښکاري چې دغه موضوع نوره هم لانجمنه شوه له بله پلوه تر اوسه د ماليې وزارت د دولت د کارکونکو مياشتيني معاشونه د تير کال د بودجې له مخې ترسره کوي چې دې کار په مالي چارو ناوړه اغيزې شيندلي دي .