جانتن بيلي له واشنگټن څخه

	د ايف بي اى ځينو کارکوونکو ليدلي دي چې د زندانيانو پښې او لاسونه پر مځکه په زنځير تړل شوي دي

د امريکا د مدني ازاديو ټولنې ايف بي اى اړ کړ چې د معلوماتو د ازادۍ له قانون سره سم دغه رپوټ خپور کړي .

ولسمشر بوش څو ځلي ويلي چې امريکا د شکنجې پلوي نه ده او له زندانيانو سره انساني چلند کوي . خو د امريکا د پلټنو د فدرالي ټولنې يا ايف بي اى دغه رپوټ داسې ښکاروي چې د ښاغلي بوش له خبرو سره تضاد لري .

دغه رپوټ د هغو سختو شرايطو او تکتيکونو مفصله ښکارندويي کوي چې د ايف بي اى ځينو کارکوونکو په گونتانامو کې ليدلي دي .

گڼو کارکوونکو ليدلي دي چې د زندانيانو پښې او لاسونه پر مځکه په زنځير تړل شوي ، نه څوکۍ لري ، نه خواړۀ او نه هم اوبه ورسره شته .

داسې رپوټونه دي چې زندانيان تر څو ورځو پورې په تيزې رڼا او د لوړ غږ پر موسيقيو وېښ ساتل شوي دي .

يو زنداني ليدل شوى چې له يخه ريږدېدۀ او بل يو بيا د ساتونکو له داړونکي سپي سره مخامخ شوى و .

تحقيق کوونکي ليدل شوي چې زندانيان سپکوي او پر يوۀ زنداني د اسراييلو بيرغ اچوي .

ايف بي اى چې د خپلو کارکوونکو له ډلې له نژدې ٥٠٠ کسانو څخه پوښتنې کړي وايي چې په دغو فعاليتونو کې د دوى يو کس هم لاس نه لري .

ايف بي اى د امريکا د استخباراتو د مرکزي ادارې يا سي اى اې د تحقيق له ځينو تکتيکونو سره جوړه نه ده خو بيا هم خپل دغه رپوټ ډير مهم نه بولي او وايي چې دغه ډول معلومات لا پخوا عامو خلکو درلودل .