دانيلا ريليپ له واشنگټن څخه

	ملگري ملتونه وايي چې په گوانتانامو کې ځينې اعمال د دوى په گومان ښه نه دي .

د دغه رپوټ يوه نسخه د لاس انجلس ټايمز ورځپاڼې تر گوتو کړى دى .

د ورځپاڼې خبر وايي د ملگرو ملتونو رپوټ پر متحدو ايالاتو تور لگوي چې د زندانيانو په شکنجه کولو يې نړيوال قوانين تر پښو لاندې کړي دي .

د لاس انجلس ټايمز ورځپاڼه وايي دوى د ملگروملتونو د هغۀ رپوټ يوه نسخه يا کاپي ليدلې ده او د هغۀ له يوۀ ليکوال سره يې خبرې کړي دي .

دغه سند دعوه کوي چې د گوانتانامو په زندان کې له ځينو زندانيانو سره چلند د ملگرو ملتونو د شکنجې له تعريف سره سم دى .

په ځانگړې توگه د اندېښنې وړ خبره هغو زندانيانو ته د نلکو له لارې په زور د ډوډۍ ورکړه ده چې د نه خوړو په اعتصاب بوخت دي .

زندانيانو شکايت کړى دى چې د دغو نلکو کارونې سخت درد لرلى ، وينه يې پرې بهولې او خوا يې ورگرځولې ده .

د ملگرو ملتونو ټيم د گوانتانامو پر قانوني دريځ هم پوښتنه راپورته کوي . دوى وايي داسې هلې ځلې لږ شوي دي چې د جنگي غليمانو په توگه دغه زندانيان ثابت کړي .

رپوټ د امريکا په خاوره کې د زندانيانو د محاکمه کولو په هيله د گوانتانامو د بندولو غوښتونکى دى .

امريکايي حکومت يوې ورځپاڼې ته په دومره تفصيل د رپوټ پر رسيدلو نيوکه کړې ده . د بهرنيو چارو د وزارت يوۀ وياند وويل د رپوټ ليکوالانو هيڅکله دغه کمپ ليدلى نه دى او پايلې يې د گنگوسو پر بنسټ دي .

دۀ وويل دا ټول سند د دعوو او گنگوسو يوه ټولگه ده .

د نړۍ نور خبرونه د دې ځاى په کېکاږلو ترلاسه کولى شئ