د ((گوانتانامو لار)) په نامه دا فلم د هغو څو برتانوي مسلمانانو نکل دى چې د طالبانو د نسکورولو پرمهال په افغانستان کې د امريکايي ځواکونو په لاس کښيوتل

د ((گوانتانامو لار)) په نامه دا فلم د هغو څو برتانوي مسلمانانو نکل دى چې د طالبانو د نسکورولو پرمهال په افغانستان کې د امريکايي ځواکونو په لاس کښيوتل او پرله پسې څو کلونه يې د گوانتانامو په زندان کې تېر کړل.

دا ډرامه چې ځينې برخې يې مستندې، نورې يې د گډون کوونکو مرکې او ځينې نورې يې له سره جوړې شوې صحنې دي، په جايزو نمانځل شوي سينمايي لارښود مايکل وينټرباټوم چمتو کړى دى.

د فلم صحنې په افغانستان، پاکستان او ايران کې اخيستل شوي دي. په دې کې څلور ياران ښکاري چې د ٢٠٠١ کال په سپټمبر کې د انگلستان د لوېديځ له ټېپټن نه د يوه واده لپاره پاکستان ته ځي، خويوازې درې يې په دې بريالي کېږي چې دوه نيم کاله وروسته خپلو کورونو ته ستانه شي.

وينټرباټوم غواړي چې د نوي لمريز کال په درشل کې د ((گوانتانمو لارې)) تر ښودلو وړاندې هغه د برلين د فلمونو د نړيوال فستيوال ٥٦ سيالۍ ته وړاندې کړي.

دده څو فلمونو جايزې گټلي دي لکه، د پتنگ مچه، زه تاغواړم، سرايووه ته ستړي مشئ، ادعا، د ٢٤ ساعته مېلمستيا خلک، کوډ- ٤٦ او نهه سندرې.

د مايکل وينټر باټوم يو بل فلم چې اروپا ته د دوو تنکيو افغان زلموټو د پټ راتگ بوږنوونکى نکل وو، په ٢٠٠٣ کال کې د برلين د فستيوال د زرين ايږ جايزه او په ٢٠٠٤ کال کې د نا انگريزي ژبې په فلمونو کې د بافتا د ډېر ښه فلم جايزه گټلې وه.

د ((گوانتانامو لار)) فلم د لارښوونې مرستيالي د مېلېسا پارمنټر پر غاړه وه او د ريولوشن فلم له خوا چمتو شوى دى.

دغه فلم د مارچ پر نهمه د برتانيې د ټلويزيون پر څلورم کانال ښودل کېږي.

د هنر او ادب پاڼې ته د دې ځاى په کېکاږلو ستنيدلى شئ