هندي فلمونه په ټوله نړۍ کې خورا ډير مينه وال او ليدونکي لري .

د سټار ټي وي وياند وويل چې ددې پروګرام د هرې برخې له لارې دې ټلويزوني چينل يو ١٢ ميليونه كلدارې لاسته راوړنه درلوده او له بنديدو سره يې دوى ته لوى زيان اوښتى دى .

ده وويل كله چې دوى ته څرګنده شوه چې ښاغلى بچن نور نه شې كولى چې ددوى پروګرام پر مخ بو ځي نو د هغه د ځاى ناستي په لټه كې شول .په دې لړ كې يې د اميتاب له زوى ابيشيك بچن سره هم ليدلي دي خو هغه ورته وويل چې د پروګرام د چلولو لپاره وخت نه لري .

سټار ټي وي د ( څوک غواړي ميليونر شي) پروګرام په ٢٠٠٠كال ميلادي کال كې پيل كړ .

دا پروګرام د يو امريكايي ټلويزوني چينل د پروګرام په تقليد پيل شو چې ورو ورو يې ډير شهرت تر لاسه كړ .

د سټار ټي وي د يوې څيړنې له مخې يوازې په هند كې دې پروګرام دوه ميليونه نندارچيان درلودل .

د تير ميلادي كال په وروستيو مياشتو كې ښاغلى بچن د كولمو د درد له كبله څو اوونۍ په روغتون كې تيرې كړې او له جراحي عمل څخه وروسته د يوې مياشتې د ارام مشوره وركړل شوه .

نو ځكه ډيرى انځوريزې كمپنۍ د هغه د روغتيايي حالت ښه والي ته ستر ګې په لار وې .

خو اوس څرګنده شوې ده چې ښاغلى بچن د پر له پسې يوه كال ارام ته اړتيا لري .

د هندوستان د فلمونو شننونكي وايي چې د باليوډ د فلم جوړولو بيلا بيلو څانګو له ٣٠٠٠ ميليونو څخه زياتې پيسې پر هغو فلمونو لګولي دي چې ښاغلي بچن په كې مركزي رول درلود او د روغتيا د خرابېدو له كبله يې ددغو فلمونو ډكول نيمګړي پاتې شول چې وايي د كمپنيو خاوندان يې له اقتصادي زيان سره مخامخ كړي دي .

مخكې له دې چې په تيرو مياشتو كې اميتاب بچن روغتون ته لاړ شي د هند تر ګردو بوخت فلمي ستورى و د هند د ماليې وزارت يوۀ چارواكي وويل چې په باليووډ كې له اميتاب بچن څخه هيڅوك زياته ماليه نه وركوي .

د ښاغلي بچن كلنى عايد ١٩٠ ميليونه كلدارې ثبت شوى دى چې د هندوستان د هنر په ډګر كې هيڅوك دومره زياته اقتصادي لاسته راوړنه نه لري .

هغه ٦٣ ميليونه روپۍ د ماليې په توګه وركړي دي .

ډيرې هغه فلمي كمپنۍ چې اميتاب بچن ورسره تړنونه لاسليك كړي وو ، د هغه د بديل د موندلو په لټه كې دي .

د هنر او ادب پاڼې ته د دې ځاى په کېکاږلو ستنيدلى شئ