ويليام هارسلي لندن

	د اتريش لومړي وزير شوسيل ښاغلي بوش ته يو ډېپلماتيک لکچر ورکړ.

د امريکا او اروپايي ټولنې ترمنځ ترينگليتا په تېرو دريو کلو کې د امريکا له خوا د عراق د جگړې د پيل پر سر د دواړو لورو ترمنځ د واټن په ډېرېدو ډېره شوې ده. دې سرمشريزې د هغوى بېرته نژدې کېدل وښودل، ځکه چې دواړو خپل امنيت ته پېښ گواښونه په ورته ډول وارزول.

ولسمشر بوش د گوانتانامو د زندان په اړه بيخي په ډانگ پييلى غږېده، ويې ويل چې دى هم غواړي "هغه وتړي" او دا کار به تر هغه وروسته وکړي چې د امريکا ستره محکمه د يو شمېر بنديانو د احتمالي محاکمې ځينې پاتې حقوقي پوښتنې حل کړي.

ولسواکۍ بايد آن تر داسې بوږنونو وروسته لکه پر امريکا د سپټمبر د يوولسمې بريدونه، هم خپل اصول پرېنږدي لومړى وزير شوسيل

د اتريش لومړي وزير شوسيل د قانون د واکمنۍ په اړه ښاغلي بوش ته يو ډېپلماتيک لکچر ورکړ، ويې ويل ولسواکۍ بايد آن تر داسې بوږنونو وروسته لکه پر امريکا د سپټمبر د يوولسمې بريدونه، هم خپل اصول پرېنږدي.

د دواړو خواو ترمنځ د سوداگرۍ پر نوي نړيوال تړون د خبرو په اړه ژور توپيرونه هم شته. خو د ايران او شمالي کوريا په اړه امريکاييانو او اروپاييانو په يوه زړه خبرې کولې. ولسمشر بوش وويل ايران ته د خپل شکمن اټومي پروگرام د درولو په بدل کې د مرستو وړانديز معقول دى او هغه پر تهران د آگست مياشتې تر پايته رسېدو وړاندې د يوه ځواب د ورکولو زور واچاوه.

په همدې ترڅ کې داروپايي کميسيون مشر خوزې مانويل باروسو له روسيې نه د انرژۍ په برخه کې د لا راڼه چال چلند په اړه د امريکايي غوښتنې ملاتړ وکړ. هغه وويل اروپايي ټولنه د امريکا په څېر له روسيې نه غواړي چې د اتو صنعتي هيوادو راروانه سرمشريزه د انرژۍ د يوه راڼه او بې توپيره نړيوال بازار د جوړولو لپاره وکاروي.