طاهر خان له اسلام اباد څخه

	مشرف وايي چې د پولې بلې غاړې ته د جنګيالو د مخنيوي لپاره پاکستان افغانستان سره همکاري کوي.

اسلام آباد څخه برتانوي ټيلى ويژني شبکې چېنل فور سره په يوې ځانګړې مرکه کې جنرال مشرف وويل چې جنګيالو د خپلو فعاليتونو لپاره افغانستان کې مراکز جوړ کړي دي او ويې منل چې اورپکي پاکستان کې هم خواخوږي لري.

هغه وويل چې د پولې بلې غاړې ته د جنګيالو د مخنيوي لپاره پاکستان افغانستان سره همکاري کوي.

د جنرال مشرف په وينا:

(( موږ له پکار دي چې افغانستان کې دننه د جنګيالو فعاليتونه او هر هغه څه چې پاکستان کې کيږى د دواړو په ضد ګامونه واخلو ولې افغانستان کې د اورپکو د فعاليتونو د مخنيوي لپاره کلک ګامونه اخستل پکار دي ))

کله چې د جنرال مشرف څخه وپوښتل شول چې آيا کوټه د طالبانو مرکز ګرځيدلى نو هغه وويل : د ډلې مرکز افغانستان کې موجود دى- طالبانو د خپل قوماندې نظام په ٥ برخو کې ويشلې دى چې هره سيمه يو قوماندان لري.

جنرال مشرف ادعا وکړه چې جنګيالو ته د نړيوالو قاچاقبرو د لارې پېسې ورکول کيږى.
هغه ومنل چې تر څه حده دغه خلک کوټې څخه هم مرسته ترلاسه کوي چې دغه ښار کې ٤٥٠ زره افغان کډوال موجود دي.

د جنرال مشرف په وينا کوټه د دغه رنګې فعاليت لپاره يوه سرچينه ده.پاکستاني ولسمشر زياته کړه چې په پاکستان د تورونو لګولو په ځاى دې ځمکني حقايق په پام کې ونيول شي او ماتې دى په برياليتوتوب کې بدل کړى شي.

هغه وويل چې بعضو خلکو له پاکستان څخه د قربانۍ د ګډورې په جوړولو يوه ډيره آسانه لار خپله کړې ده.

هغه زياته کړه که چيرې په پاکستان د تورونو سلسله هم دغه رنګې جاري وي نو کيدى شى افغانستان کې په بشپړه توګه برياليتوب ترلاسه کول مشکل وي.

پاکستاني ولسمشر وويل چې هغه په پوله د غير قانوني تګ راتګ د مخنيوي لپاره يو څو وړانديزونه کړي و چې پکې ازغن تار او په پوله ماين ښخول هم شامل و.

هغه يو وارې بيا په پوله د ماين ښخولو د خپل وړانديز تکرار وکړ چې د جنرال مشرف په وينا د دغې کار په بنياد به دا يقني کړى شي چې هيڅوک په غير قانوني توګه د پولې څخه تير نه شي .