د کالاباغ د بند له جوړولو سره يوازې پنجاب مثبت نظر ښيي نور پاکستان يې په مظاهرو کې مخالفت ښوولى

ددغو ايالتونو ملتپالي او نور سياستوال تور لگوي چې اسلام آباد د کالا باغ د اوبو بند يوازې ددې لپاره جوړوي چې د پنجاب ايالت ته گټه ورسوي.

ښاغلي مشرف نن ( د مرغومي ٢ د دسمبر ٢٣ ) د سندپه ايالت کې يوې غونډې ته وويل که چېرې دا بند جوړ نه شي، نو ددې لسيزې تر پايه به هيواد د اوبو له کموالي سره مخامخ شي.

خو د سرحد ، بلوجستان او سند ايالتونو سياستوال دا خبره ردوي او وايي د کالاباغ پر ځاى دې نور بندونه جوړ شي چې لا پخوا يې د جوړيدا خبرې کيدې .

سرحد ويره لري چې د کالاباغ له جوړيدو سره به د پېښور او شاوخوا سيمې تر اوبو لاندې شي او سند بيا د اوبو د نشتوالي ډار لري .

د کالاباغ د بند له جوړيدا سره د سند د جلا کيدو وړانديز د ولسمشر مشرف په شته والى کې شوى و او د پنجاب ځينو سياستوالو منلى و .

د واکمن مسلم ليگ گوند مشر او د پنجاب ايالت سياستوال شجاعت حسين له بي بي سي سره په خبرو کې ويلي دي چې د کالاباغ بند د جوړولو لپاره د سنديانو هر ډول شرط په سر سترگو مني خو که هغوى جلا هيواد ځانته غواړي نو دا به د پاکستان اساسي قانون ورسره ونه مني .

د دسمبر په ١٠ نېټه په اسلام اباد کې د لومړي وزير په دفتر کې د کالاباغ بند په باب د سند ايالت له واکمن گوند سره په خبرو کې د سند ډاکټر غفار جتويي گواښ کړى و چې که د کالاباغ بند جوړ شي نو ورسره به سند جلا هيواد وي او له پاکستانه به د بيليږي .

د رپورټونو ترمخه شجاعت حسين او مشاهد حسين دا وړانديز منلى وو خو ولسمشر مشرف پرې غلى شوى و . د ښاغلي حسين دا وروستۍ څرگندونې د خبريالانو په گومان په دې نيت شوي دي چې په هغې غونډې کې له خپل ښکاره کړي دريځه اوس ځان گوښه کړي .

د پاکستان نور خبرونه د پاکستان له پاڼې ترلاسه کولى شئ