بلوڅان : له پاکستاني پوځيانو سره روانه جگړه په اصل کې د طبيعي شتمنيو پر سره ده

دا نښتې له کوټې څخه د ختيځ لورې ته د کوهلو په سيمه کې د څلورمې ورځې لپاره د پاکستاني پوځ عمليات د مري بلوڅو خلاف چې په حکومتي ضد بريدونو تورن شوي، روان دي.

په دې عملياتو کې د پاکستان منظم پوځ او ملېشې گډون لري.

د مري بلوڅو مشران وايي چې په اخ وډب کې گڼ ولسي وگړي وژل شوي دي.

د پاکستان پوځ بيا له خپله لوري ټينگار کوي چې ددوى نښه عادي وگړي نه بلکه هغه څوک دي چې پر پوځي پوستو بريدونه کوي.

د پوځ يوه چارواکي وويل پوځ د هغو کسانو پر ضد کارکوي چې د دوى په فکر پر پوځې هدفونو يې د بمونو اوتوغنديو حملې کړي دي.

په همدې ترڅ کې د مري بلوڅانو يوه مشر وويل له پاکستاني پوځيانو سره روانه جگړه په اصل کې د طبيعي شتمنيو پر سره ده.

بالاچ مري بي بي سي ته وويل د پاکستان حکومت هېڅکله د هغوى ستونزو ته پام نه دى کړى. ښاغلي مري چې په کوټه کې زموږ له همکار ايوب ترين سره غږېده، ومنله چې يو شمېر وسله والې ډلې په بلوچستان کې د خپلو حقونو لپاره مبارزه کوي، خو ده وويل چې نه ددغو ډلو مرسته کوي او ورسره مخالفت لري .

په کوټه کې د بي بي سي يو خبريال وايي چې ترنگلتيا وروسته له هغه زياته شوه چې د بلوچستان د خپلواکۍ غورځنگ تيره اوونۍ د ولسمشر پرويز مشرف له لورې د سمې د سفر پر مهال پر يوې پوځي چورلکې ډزې وکړې.

له پاکستان سره تړلي نور خبرونه د پاکستان له پاڼې ولولئ