د پاکستان په څلورو سرو ايالتونو کې بلوچستان تر ټولو بې وزلى دى خو د غازو شتمني يې نورو ايالتونو ته ځي .

د بمباريو له امله د ځاني زيان په باب بيلا بيل رپورټونه ورکړل شوي دي .

د مري بلوڅانو يوۀ مشر مير بالاج خان مري وايي په دغو بمباريو کې ٧ ملکي کسان وژل شوي دي او ٥٠ لا تر اوسه تري تم دي .

پاکستاني پوځ وايي دوى د مريانو روزنيز کمپونه په نخښه کړي دي . خو دا نه وايي چې څومره کسان يې وژلي دي .

د بلوچستان د بوگتي ټبر بلوڅان هم وايي چې د دوى په سيمه کې وضعه ترينگلې ده او پاکستاني پوځ کلابنده کړي دي .

د بلوچستان څلورو بلوڅو ملت پالو گوندونو د پاکستاني پوځ بريدونه غندلي دي او وايي د چارشنبه په ورځ به په احتجاج لاس پورې کوي .

د پاکستان د کورنيو چارو وزير افتاب احمد خان شيرپاو چې تر وړمې ورځې يې لا په بلوچستان کې د نښتو خبره نه منله نن ( د ليندۍ ٢٨ د دسمبر ١٩ ) په کوټه کې د يوې غونډې مشري کړې ده او په بلوچستان کې يې د پاکستاني پوځ له مشر سره کتلي دي .

په دغه سيمه کې څو ورځې وړاندې هغه وخت لانجه پيدا شوه چې د ولسمشر جنرال پرويز مشرف د سفر په ترڅ کې توغندي وتوغول شول .

د پاکستان د پوځ دوو لوړ پوړو جنرالانو د توغنديو د بريد د پلټنې په تمه سيمې ته سفر وکړ خو د دوى پر چورلکو هم توغندي وتوغول شول چې پکې دواړه جنرالان ټپيان شول .

بلوڅان د خپل ايالت د طبعي زيرمو ونډه غواړي او د ډيرې خپلواکۍ غوښتونکي دي .

د پاکستان په باب نور خبرونه د پاکستان له پاڼې لوستى شئ