هلمند د افغانستان يو له نا ارامو ولايتونو څخه دى چې په دې وروستيو کې په زرگونو برتانوي سرتيري پکې ځاى پر ځاى شوي دي

له گڼې گوڼې ډک بازار کې شوې دغې چاودنې ډير ماشومان وژلي دي . د هلمند ولايت چارواکي وايي په وژل شويو کې ١٥ ماشومان دي .

د ٤٧ ټپيانو له ډلې څخه د شپږو حالت ښه نه دى .

د طالبانو په استازيتوب يوۀ کس خبري رسنيو ته ويلي چې دغه چاودنه د دوى له خوا شوې وه .

وسله وال طالبان ادعا کوي چې دا ځانمرگى بريد نه و بلکې د دوى له خوا ځاى پر ځاى شوى بم و چې له ليرې د ريموټ کنټرول په مټ وچوول شو .

طالبانو ويلي چې دوى د ډاکټر نجيب د واکمنۍ په ورځو شپو کې د هلمند ولايت د امنيت ساتونکى جنرال خان محمد په نخښه کړى چې د دوى په وينا يې هغۀ او د هغۀ شپږ نور ملگري وژلي دي .

خو د لشکرگاه په روغتون کې د نژدې ٥٠ کسه ټپيانو ډيره برخه د ملکي کسانو وه . چارواکو ويل چې په وژل شويو کې يوازې دوه کسه بالغان وو نور يې ټول له پنځه کلنۍ تر ١٢ کلنۍ پورې واړۀ ماشومان وو .

هلمند د افغانستان يو له ناکرارو ولايتونو څخه گڼل کيږي خو ځانمرگي بريدونه پکې د گاونډي ولايت کندهار په پرتله خورا لږ شوي دي .

څه موده وړاندې د طالبانو له خوا د کندهار ولايت د پنجوايي په ولسوالۍ کې هم له گڼې گوڼې ډک بازار کې ځانمرگى بريد شوى و چې ٢١ ملکي کسان يې ووژل .