محمود کوچى د ولسي جرگې له تالاره

	ولسي جرگه په دې هيله ده چې دغه جرگه گۍ به په سرحدي ولايتونو کې د امنيت چارې وڅاري او دا کار به له امنيت سره مرسته وکړي .

د ولسي جرگې په غونډه کې د افغانستان په بيلابيلو سيمو کې امنيتي ترينگلې وضعه وڅيړل شوه د يو شمير وکيلانو په وينا تر هغې پورې چې په ولايتونو او ولسواليو کې چارواکي بدل رابدل نه شي نو امنيتي وضعه به همداسې ترينگلې وي ، هغوى دا خبره هم په زغرده کوله چې دولت به تر کومه د ډلو ډلگيو د خوشاله ساتلو لپاره جوړ جاړي ته غاړه ږدي .

د دې خبرې تر څنگ ځينو استازيو بيا ويل چې ائتلافي ځواکونه دې په افغانستان کې خپلې پاتې کيدنې ته قانوني بڼه ورکړي او دا دې هم په ډاگه کړي چې تر کومه به په افغانستان کې پاتې کيږي .

گڼو استازيو ختيځ گاونډى پاکستان نيغ په نيغه په شته نا امنيو کې ښکيل وگاڼه.
دغو استازيو د امريکې له متحده ايالاتو نه گيله وکړه چې ولې په پاکستان زور نه اچوي چې په افغانستان کې لاسوهنه بنده کړي ، د پکتيا ولايت استازې شريفه زرمتۍ يوه له همدغو استازيو نه ده :

( موږ وينو چې نا امنۍ ورځ په ورځ ډيريږي ، د ملي پوځ ، ملي پوليسو او نړيوالو سوله ساتو ځواکونو سره سره بيا هم نا امنۍ په زور کې روانې دي ، گاونډۍ هيواد پاکستان په ښکاره ډول لاسوهنه کوي ولې متحده ايالات په هغه هيواد زور نه اچوي چې په افغانستان کې لاسوهنه بنده کړي .)

د ولسي جرگې مشر يونس قانوني شوي خبرې غوټه کړې او د داسې جرگگۍ د جوړيدو وړانديز يې وکړ چې په هغې کې به د ملي شورا د استازيو تر څنگ د ملي پوځ ، ملي پوليسو او ائتلافي ټلوالې لوړ پوړي چارواکي هم ونډه ولري :

( موږ به د ملي شورا د غړو ، ملي پوځ او نړيوالو ائتلافي ځواکونو په گډون داسې يوه جرگگۍ جوړوو چې ټولې امنيتي چارې وڅيړي او د سمون لپاره يې په کار دي چې لازم تصميمونه ونيول شي .)

په پام کې وه چې د ولسي جرگې راتلونکې غونډې ته د سترې محکمې لپاره نومول شوي قاضيان د باور درايو د ترلاسه کولو لپاره جرگې ته حاضر شي خو د سترې محکمې له لورې دغه کار بلې راتلونکې غونډې ته وځنډيد.