کپتان ريس احمدزى او تکړه لوبغاړى دولت احمدزى د افغانستان له دوو مخکښو کريکټ لوبغاړو څخه گڼل کيږي .

د ايم سي سي د کلب کپتان د انگلستان پخوانى کپتان مايک گېټينگ دى .

دغه لوبډله په نړۍ کې له هغو هيوادونو سره لوبه کوي چې د کريکټ لوبه پکې نوې غوړيدلې وي .

ايم سي سي نيت لري چې په روان کال کې له چين ، بوتسوانا او زمبيا سره هم لوبې وکړي .

مايک گيټنگ له افغانستان سره د لوبې په باب په لېوالتيا وويل :

(( زۀ خوښ يم دا موقع مومم چې له افغانستان سره په دې تاريخي لوبې کې د ايم سي سي کپتاني کوم . په تيرو څو کلونو کې په افغانستان کې کريکټ لوبه خورا په چټکۍ خپره شوې ده . موږ له دغۀ بهير سره مرستې ته لېواله يوو . )).

	مايک گيټينگ د انگلستان يو له ډيرو برياليو کپتانانو گڼل کيدۀ .

د ايم سي سي مشر رابين مارلر وويل :

(( په افغانستان کې په جدي ډول د کريکټ لوبې پيل څو کاله وړاندې هغه وخت وشو چې د ايم سي سي يوۀ غړي مارک سکراس ډيکنز زموږ په يوې غونډې کې ياده کړه چې په افغانستان کې کريکټ لوبه خورا ډير مينه وال لري . ))

ايم سي سي په ٢٠٠٢ کال کې د افغانستان د يوې کريکټ لوبډلې او په کابل کې د نړيوالو سوله ساتو سرتيرو ترمنځ هم د کريکټ يوه لوبه تنظيم کړې وه .

د افغانستان کريکټ ملي لوبډلې په دې وروستيو کې د پام وړ لاسته راوړنې لرلي دي .

تيره مياشت افغان لوبغاړي د منځني ختيځ د کريکټ په اتلوليو کې پايلوبې ته ورسيدل .

تير کال د افغانستان تر ١٥ کالو د کم عمر لوبغاړي هم په نړيوال ډگر کې ښه ځليدلي وو .

د لوبو نور خبرونه د دې ځاى په کېکاږلو ترلاسه کړئ