 |  په جگړه ځپلي افغانستان کې اوس کريکټ لوبه ډيره غوړيدلې ده |
د اسيا د ١٧ کلنو کريکټ لوبغاړو په سيالۍ کې به افغانستان په منځلوبو يا کواټرفاينلز کې له کوربه هيواد ماليزيا سره لوبه کوي . افغانستان د سي گروپ په گټلو سره نن هغه وخت منځلوبو ته ورسيد چې د بروناى لوبډلې ته يې په ٣٤٤ منډو ماتې ورکړه . بروناى د شير خط تر گټلو وروسته افغان لوبغاړو ته لومړى د منډو جوړولو بلنه ورکړه . افغانستان په خپل ټاکلي وخت کې د نهو لوبغاړو په سوځيدو ٣٥٦ منډې جوړې کړې او په ځواب کې يې د بروناى ټوله لوبډله ايله په ١٢ منډو وسوځوله او په دې توگه يې لوبه په ٣٤٤ منډو وگټله . د افغانستان له لورې نن محمد شاه ١١١ منډې وکړې خو بل افغان لوبغاړى عزت الله د ٦٣ منډو او څلورو لوبغاړو په سوځولو ښه وځليد دا د اسيا د ١٧ کلنو لوبغاړو په سيالۍ کې د افغانستان دوهم پرله پسې برى دى . |  افغان لوبغاړي عزت الله په دواړو لوبو کې ښه وځليد .  |
د جمعې په ورځ افغان لوبغاړو د نيپال تکړه لوبډلې ته په ٤٩ منډو ماتې ورکړې وه . دا لومړنى ځل دى چې افغان لوبغاړي د اسيا د کريکټ د ١٧ کلنو لوبغاړو په سيالۍ کې برخه اخلي . له نيپال سره په لوبه کې د افغانستان لوبغاړى عزت الله د لوبې غوره لوبغاړى تر هغه وروسته وپېژندل شو چې ٢١ منډې يې جوړې کړې او پنځه نيپالي لوبغاي يې وسوځول | 
دا پاڼه کوم ملگري ته ولېږئ
چاپي بڼه