عبدالمالک عاصم له کابله

همدارنگه د ولسي جرگې غړو په دې هم پريکړه وکړه چې د باور د رايې د ورکړې پر وخت له وزير نه نيغ په نيغه سوالونه کولاى شي .

دافغانستان د ولسي جرگې غړو دا ويل چې وزيران دې يو يو د باور د رايې د اخيستو لپاره را وړاندې کيږي او دوى به ورته د باور رايې ورکوي .

په لوى اکثريت دا ومنل شوه چې که کوم وزير د باور رايه ترلاسه نه کړه نو ولسمشر دې بل کس ولسي جرگې ته ور وړاندې کړي او که هغه هم دباور رايه ترلاسه نه کړه نو دوى داحق لري چې د دريم ٤ ،٥ کس او له دې زيات پسې دا لړۍ وغځوي ترهغو چې هغه وزير دباور رايه تر لاسه کړي .

په دې برخه کې څونورنظرونه هم موجود وو

اول که کوم وزير په لومړي او دوهم وار د باور رايه ترلاسه نه کړه نو دريم ځل دې د ولسمشر واک وي او هم هغه د دريم ځل وړاندې شوي به د جرگې لخوا منل کيږي.

دوېم بيا که کوم وزير په لومړي او دوهم وار د باور رايه ترلاسه نه کړه نو دريم ځل به ولسمشر د ولسي جرگې د جرگه گيو له مشرانو سره په سلا يو کس نوموي او بيا به ولسي جرگي ته وړاندې کيږي.

او دريم داچې ولسمشر به په دريم ځل د هم هغه وزارت لپاره چې وزير يې د باور رايې ترلاسه نه کړاى شوه څو کاندېدان به جرگې ته وړاندې کوي چې يوه ته به يې د باور رايه ورکوي .

خو داوروستي درې واړه نظرونه د وکيلانو له خوا رد شول . او وکيلانو وويل چې نه غواړي خپل واکونه نوروته وليږدوي .

بله مهمه موضوع چې د ولسي جرگې غړو پرې گڼ بحثونه وکړل د ٨٦ رايو په ور کولو سره دا فيصله وشوه چې يو وزير دې دباور درايې د اخيستو نه وړاندې بايد په نيم ساعت کې پرخپل ژوند ليک ، لوړو زدکړو، کاري تجربو او راتلونکو پلانونو رڼا واچوي .

او وکيلان کولاي شي چې تر دې وروسته نيغ په نېغه له هم هغه وزير نه پوښتنې پيل کړي . او له دغه سوال او ځواب وروسته به وزير له تالاره وځي او د ولسي جرگې غړي به دهغه په غياب کې د باور رايې ورکوي .

خو دپوښتنو په څرنگوالي باندې لاهم فيصله نه ده شوې .