د باب ترويليان رپوټ د عربي چارو لپاره د بي بي سي خبريال

	په عراق کې د امريکا سفير زلمي خليلزاد ويلي دي متحد ايالات به پر هغه حکومت پيسې ودروي چې د ټولو عراقيانو استازيتوب نه کوي .

ښاغلي خليلزاد د توکمپالنې د زياتيدلو پر خطرونو خبرې وکړې او ويې ويل چې د عراقي ټولنې جلا والي په هغۀ هيواد کې پر هر څه اغيز کړى دى .

د متحدو ايالاتو د سفير دا څرگندونې داسې ښکاروي چې په عراق کې له سياسي او امنيتي پرمختياو څخه امريکاييان زړۀ تنگي شوي دي .

په دې وروستيو کې توکميز تاوتريخوالى ډير شوى او دغلته له ټاکنو دوه مياشتې وروسته لا هم د نوي حکومت جوړولو لپاره د خبرو اترو نخښې نشته .

نوى پارلمان به په لومړي ځل په همدې روانه اوونۍ کې سره ويني ښاغلى خليلزاد به په هيله وي چې د دۀ دا څرگندونې به د ولسي جرگې نوي غړي دقت ته اړ باسي .

دى په ځانگړې توگه د دفاع او کورنيو چارو وزيرانو ته اندېښمن دى چې څوک به وي ، همدا دوه تر ټولو ډير حساس وزارتونه دي همدا دواړه وزارتونه له باغيانو سره د جگړې ، د زندانونو د چلولو او د امن او امان د راوستو مسووليت لري .

د کورنيو چارو اوسنى وزير بيان جبار د لوى شعيه ايتلاف غړى دى چې په ټاکنو کې يې ډيرې څوکۍ گټلي دي او په دې ټينگار کوي چې دغه وزارت بايد له دوى سره پاتې شي .

خو سني عربانو غوښتنه کړې ده چې ښاغلى جبار دې ليرې شي . دوى ادعا کوي چې يوې وژونکې ډلې د دوى ټبر په نخښه کړى دى ، دغه ډله له کورنيو چارو وزارت سره تړاو لري او يا يې ان يوه برخه ده .

د دغه وزارت له خوا په کنتروليدونکو زندانونو کې له زندانيانو سره د بد چلند رپوټونه هم ورکړل شوي دي . له خپله اړخه د کورنيو چارو وزارت دا خبره ردوي چې گواکې دوى سنيان په نخښه کړي دي دوى استدلال کوي چې ډير کله دغه ادعاوې له مبالغو ډکې وي .

خو سنيان په اوسنۍ بڼه پر دغۀ وزارت باور نه کوي چې د ځان په باب به پلټنې وکړي او نا مطلوبه عناصر به ختم کړي .

د ښاغلي خليلزاد دا وروستۍ څرگندونې داسې ښيي چې ښايي دى هم په همدې نظر وي او شايد د نوي حکومت د جوړيدو په برخه کې لا ډيره فعاله ونډه واخلي .

د نړۍ نور خبرونه د دې ځاى په کېکاږلو ترلاسه کړئ