داسې اټکل دى چې په اوسني عراقي پوځ کې هم ډير کسان د پخواني رژيم دي .

دغه وړانديز هغو ټولو افسرانو ته دى چې د جگړن تر رتبې رسيدلي وو .

د عراق يوۀ دولتي وياند لطيف کوبا بي بي سي ته وويل وزيران په دې وپوهيدل چې په ډير لنډ وخت کې له هيڅ څخه د پوځ جوړول ناشوني دي .

د دفاعي چارو لپاره د بي بي سي خبريال وايي دا چې د صدام حسين په پاشل شوي پوځ کې ډير افسران سنيان وو نو اوس پوځ غواړي چې هغوى بيرته ورشي او د عراق په سني مېشتو سيمو کې ځاى پر ځاى شي چې باغيان پکې ډير پياوړي دي .

داسې اټکل دى چې د عراق د اوسنيو افسرانو په سلو کې اويا کسانو هم په پخواني رژيم کې کار کړى دى .

دعراق ازادو افسرانو او د ملکي غورځنگ عمومي منشي نجيب ال صالحي پردې اعلان انتقاد کړى او ويلي يې دي چې دى باور نلري چې عراقي چارواکي د يو رېښتني ملي پوځ د جوړيدو په وړاندي جدي دي .

د صدام حسين د واکمنۍ پر مهال ال صالحي پخپله د عراق په پوځ کې دنده تر سره کړې ده او د نوموړي غورځنگ د جنوري په مياشت کې په پارلماني انتخاباتو کې برخه اخيستې وه.