ولسمشر بوش وايي له عراق څخه د سرتيرو د ايستلو په برخه کې به پوځي قومندانانو ته غوږ شي .

دواړو په دې ټينگار کړى دى چې له ياغيانو سره په جگړې کې عراقيان هم بايد اوږه ورکړي.

دوى وويل چې دوى به د خپلو پوځي قوماندانانو په معلوماتو گام پورته کوي که هغوي ووايي چې عراقيان د امنيت مسووليت ته چمتو دي اوڅه پوځيان راستنېدى شي نو دا کار به وکړي .

ښاغلي رمز فېلډ زياته کړه عراقيان پوهيږي چې بايد د خپل هېواد واک په لاس کې واخلي چې همدا اوس يې د دۀ په وينا وخت را رسيدلى دى.

ټاکل شوې ده چې نن ( د ليندۍ ٩ د نومبر ٣٠ ) به د ورځې په وروستيو کې ښاغلى بوش په يوې وينا کې د عراق په اړه خپله ستراتېژي بيانوي . دا مهال په عراق کې ١٦٠ زره امريکايي پوځيان دېره دي.

په يوۀ بل خبر کې له عراق څخه راپورونه وايي چې د بغداد په شمال کې د بعقوبې ښار سره نژدې په يو موټر د وسله والو کسانو د ډزو له امله نهه کسان وژل شوي او دوه نور ژوبل شوي دي