خپلواک ساپى له کابله

	له درې ورځنيو اوږدو او تودو بحثونو وروسته د ولسي جرگې غړي په رامينځ ته شوي پرمختگ خوشحاله وو .

دجرگې وکيلان دا يو لوې پرمختگ بولي او وايې له دې وروسته به يې غونډې منظمې او کارونه چټک شي . خو د مشرانو جرگه لا هم په دې اړه وروستۍ پايلې ته نده رسيدلې .

د افغانستان د ملي شوراپه دواړو جرگو کې د دريمې ورځې لپاره د دايمي کميسيونونو د جوړولو په سر بحثونه تاوده وو .په دې کې د مشرانو جرگه لاهم وروستۍ پايلې ته ونه رسيده .

خو د جرگې مرستيال ډاکټر برهانالدين شينواري بي بي سي ته وويل چې دوى اوس د تودو او جنجالي بحثنو له پړاوه اوختي او هيله يې وښوده چې د چهارشنبې د ورځې ( د سلواغې ٢٦ د فبروري ١٥ ) تر پايه به د جرگې دننه د ١٦ دايمي کميسيونونو د جوړولو چاره بشپړه شي .

ها خوا ولسي جرگې د سه شنبې د ورځې په غونډه کې د دايمي کميسيونونو د جوړولو په تړاوو د حل داسې يوه لاره راوويسته چې له مخې يې د هغو کميسيونونو د غړيتوب په سر رايې واخيستل شوې چې د کانديدانو شمير يې د غړو له وربيلې شوې ونډې پورته وو .

د دغو کميسيونونو شمير پنځوو ته رسيده چې په سر کې يې د نړيوالو اړيکو او مالي او اقتصادي چارو کميسيونونه راتله . خو پاتې ١٣ کميسيونونه چې د ډيرو کانديدان يې له وربيلې شوې ونډې کم وو ، د رايو په اتفاق تصويب شول .

اوس به د جرگې اداري هيت د عمومي غونډې له لورې د ورکړل شوي واک سره سم د دغه ډول کميسيونونو پاتې غړي دهغو وکيلانو له مينځه پوره کوي چې د رايې اچونې په بهير کې د خپلې خوښې کميسيون د غړيتوب په گټلو کې پاتې راغلي دي .

له درې ورځنيو اوږدو او تودو بحثونو وروسته د ولسي جرگې غړي په رامينځ ته شوي پرمختگ خوشحاله وو . د کابل د حوزې وکيل کبير رنجبر وايي چې له دې وروسته به د جرگې په کارونو کې د پام وړ نظم او چټکتيا رامينځ ته شي .

خو ځينو وکيلانو دا نيوکه هم کوله چې گواکې د کميسيونونو په جوړولو کې د وکيلانو مسلکي مهارتونو ته پوره پام ونه شو .

د کوچيانو وکيله پروين مومند په همدې ډله کې ده .

خو د کاپيسا ولايت وکيل حاجي احمد فريد دا ډيره د انديښنې خبره نه بولي او وايې ټول وکيلان يو شان د ملت استازي دي

ښايې د چهارشنبې په ورځ د ولسي جرگې ١٨ واړه دايمي کميسيونونه د کميسيون د ريس ، مرستيال او منشي د ټاکلو په خاطر په جلا چلا ډول غونډې وکړي .

دا ډول ښايې له دى وروسته د جرگې دننه د سياسي گروپوڼو يا ډلگيو د جوړولو خبره مخې ته شي .

دا هغه څه دي چې د ولسي جرگې وکيلان يې ارښت او اغيز د جرگې د دايمي کميسيونونو له ارزښت او اغيز سره په يوه تله تلي .

د افغانستان نور خبرونه د دې ځاى په کېکاږلو ترلاسه کولى شئ