حکيم سمسور له کابله

	يوه نوې سروې ښيي چې په افغانستان کې نژدې يو ميليون وگړي په نشو روږدي دي

د نشه يي توکو په وړاندې د مبارزې وزير حبيب الله قادري وايي د نړيوالو د ملاتړ د تر لاسه کولو په موخه ، دغه تگلاره به د لندن غونډې ته وړاندې شي .

ښاغلي قادري له بي بي سي سره په مرکه کې هيله څرگنده کړه چې نړيوال به دغه تگلاره ومني او د هغې د پلې کيدو لپاره به مالي ژمنې هم وکړي .

د نشه يي توکو په وړاندې د مبارزې وزير وايي دغه تگلاره د پنځو کلونو لپاره ده چې پلي کيدو ته ېې ٢٠٠٠ ميليونو امريکايي ډالرو ته اړتيا ده .

خو دغه مرستې به په کومې لارې لگيږي ؟

په دې باور چې د افغانستان د دولت وړتياوي کمزورې دي او دولتي ادارې په فساد کې ډوبې دي ، نړيواله ټولنه زړه نه ښه کوي چې ډيري دغه مرستې د دولت له لارې ولگوي .

ښاغلى قادري ، تر يوه حده دغه انديښنې مني ، خو وايي په تيرو څلورو کلونو کې د دولت وړتياوي ښې شوي دي او کولى شي چې تر ناحکومتي کورنيو او نړيوالو موسسو ، دولت دغه مرستې په اغيزمنه توگه ولگوي .

د نشه يي توکو په وړاندې دمبارزې وزير ټينگار کوى چې بزگرانو ته د متبادل معيشت د برابرولو ترڅنگ به ، د نشه يي توکو د قاچاق کونکو په وړاندې هم گامونه سخت شي .

پر دولت نيوکه کيږي چې په تيرو څو کلونو کې په دې کې پاتې راغلى چې په هيواد کې د کوکنار و کر چې څرنگه ېې تمه کېدله ، لږ کړي .

دارنگه پر دولت له دې کبله هم نيوکې کېږې چې وې نشو کړاى چې د ځينو په وينا هغه سيمه ييز او دولتي چارواکي چې د نشه يي توکو په قاچاق کې لاس لري ، عدالت ته راوکاږي او يا لږ تر لږ ه يې له دولتي لويو څو کيو څخه گوښه کړي .

افغانستان د نشه يي توکو دتوليد لوى هيواد پاتې دى .

افغان ولسمشر حامد کرزي نشه يي توکي د هيواد لوى دښمن بللى او ويلي يې دي يابه نشه يي توکي له مينځه وړو او يابه دغه توکي افغانستان له مينځه وړي .

دولت د نشه يي توکو په له مينځه وړلو په داسې حال کې ټينگار کوي چې د سلنيس په نوم يوې فرانسوۍ ټولنې ، پر نړيوالو غږ کړى چې په افغانستان کې د کنارو کر قانوني وگرځوي .

د افغانستان نور خبرونه د دې ځاى په کېکاږلو ترلاسه کړئ