ایبټ اباد کې د اسامه بن لادن نړول شوی کور
- Author, خدای نور ناصر
- دنده, بي بي سي اسلام اباد
اسامه بن لادن د پاکستان په ایبټ اباد ښار کې له ننه پنځه کاله وړاندې (د مې دويمه) د امریکايي ځواکونو لخوا په ځانګړو عملياتو کې ووژل شو.
پاکستان دده له وژل کېدو ١٠ مياشتې وروسته هغه کور چې اسامه پکې اوسېده، ړنګ کړ.
دا کور د ایبټ اباد په بلال ټاون کې دی، چې اوس يې یوازې د ړنګو شویو دېوالونو هغه لويې لويې سيمټي ټوټې لاهم هلته پرتې دي، چې دا کور پرې جوړ شوی و.
د اسامه بن لادن یاد کور چې په بلال ټاون کې د وزیرستان حوېلۍ په نامه مشهور و، خو اوس هغه هغه ځاى چې يو وخت په کې دا کور و د ځايي خلکو لخوا د اسامه د کور په نوم یادېږي.حال دا چې د کور يواځې يو څو سيمټي ټوټې هلته پاتې دي.
ددې پېښې تېرېدو پنځه کاله وروسته هم پاکستان نړۍ ته ددې پوښتنو ځوابونه لاهم ورکړي نه دي، چې څه ډول د القاعده شبکې بنسټګر اسامه بن لادن چې د نړۍ زبرځواکي يې په لټه کې وو، څنګه د پاکستاني پوځ يو چاوڼۍ سره نزدې اوسېده؟
همداسې د اسامه په ګاونډ کې اوسېدونکي هم وايي، دوی لاهم باور نه کوي، چې اسامه دي دلته اوسېده؟.
